ٽروبا: ويسٽ انڊيز خلاف پهرين ٽيسٽ جي ٻئي ڏينهن پاڪستان اعتماد سان بيٽنگ ڪندي ڏينهن جي پڄاڻي تي ويسٽ انڊيز جي 311 رنسن جي جواب ۾ 3 وڪيٽن تي 199 رنسون ٺاهي ورتيون.

ٽروبا ٽيسٽ جي ٻئي ڏينهن پاڪستان پهرين اننگز ۾ ويسٽ انڊيز جي 311 رنسن جي جواب ۾ 3 وڪيٽن تي 199 رنسون اسڪور ڪيون، شان مسعود 88 رنسن ۽ سلمان علي آغا صفر رنسن تي ناٽ آئوٽ آهن.

امام الحق 63، اذان اويس صفر ۽ ڪپتان بابر اعظم 23 رنسون ٺاهي پويلين موٽي ويا.

ويسٽ انڊيز جي پهرين اننگز

ٽيسٽ جي ٻئي ڏينهن ويسٽ انڊيز پنهنجي پهرين اننگز 194 رنسون 3 رانديگر آئوٽ کان اڳتي وڌائي. ڪيوم هوج 84 رنسون ٺاهي آئوٽ ٿيو، جڏهن ته شي هوپ 92 رنسن جي اننگز کيڏي.

ويسٽ انڊيز جي سڄي ٽيم کاڌي جي وقفي کان پوءِ 311 رنسون ٺاهي آئوٽ ٿي وئي.

پاڪستان طرفان محمد علي 4 رانديگر آئوٽ ڪيا، محمد عباس 3، خرم شهزاد 2 ۽ عامر جمال هڪ وڪيٽ حاصل ڪئي.

پاڪستان جي پهرين اننگز

ويسٽ انڊيز جي 311 رنسن جي جواب ۾ پاڪستان جي شروعات سٺي نه رهي، اوپنر اذان اويس بنا ڪو رن ٺاهڻ جي پويلين موٽي ويو.

ٻئي وڪيٽ لاءِ شان مسعود ۽ امام الحق 155 رنسن جي ڀائيواري قائم ڪئي، امام الحق 63 رنسون ٺاهي آئوٽ ٿيو، جڏهن ته بابر اعظم به 23 رنسون ٺاهي سگهيو.

ٻئي ڏينهن جي پڄاڻي تائين پاڪستان 3 وڪيٽن تي 199 رنسون ٺاهي ورتيون، شان مسعود 88 ۽ سلمان علي آغا بنا ڪو رن ٺاهڻ جي ڪريز تي موجود آهن.

پاڪستان کي ويسٽ انڊيز جي پهرين اننگز جو خسارو پورو ڪرڻ لاءِ وڌيڪ 112 رنسن جي ضرورت آهي.