گڏيل قومن جي اداري يونيسڪو افغانستان ۾ ڇوڪرين جي تعليم تي پابندي بابت رپورٽ جاري ڪئي آهي

يونيسڪو موجب طالبان جي ٻيهر اقتدار ۾ اچڻ کانپوءِ تقريبن 24 لک ڇوڪريون ثانوي تعليم کان محروم آهن، جڏهن ته گذريل سال جي ڀيٽ ۾ ثانوي تعليم کان محروم افغان ڇوڪرين جي انگ ۾ 2 لک جو اضافو ٿيو آهي.

يونيسڪو جي رپورٽ ۾ ٻڌايو ويو آهي ته جيڪڏهن پابندي برقرار رهي ته 2030 تائين تعليم کان محروم ڇوڪرين جو انگ 40 لک تائين پهچي سگهي ٿو. افغان ڇوڪرين ۽ عورتن کي تعليم حاصل ڪرڻ جو حق حاصل آهي ۽ اهو بنيادي انساني حق آهي.

يونيسڪو موجب ڇوڪرين جي تعليم تي پابندي جا افغانستان جي معيشت تي به سنگين اثر پئجي رهيا آهن، افغانستان ۾ 10 سالن جي عمر وارن 90 سيڪڙو کان وڌيڪ ٻار سادي لکڻي پڙهڻ کان به قاصر آهن.

يونيسڪو افغانستان ۾ ڇوڪرين جي تعليم جو حق فوري طور بحال ڪرڻ جو مطالبو ڪيو آهي ۽ افغان عورتن ۽ ڇوڪرين خلاف امتيازي سلوڪ جي پڻ مذمت ڪئي آهي.

خبر ايجنسي موجب افغانستان ۾ ڇوڪرين کي مارچ 2022 ۾ ثانوي اسڪولن ۾ وڃڻ کان روڪيو ويو هو، جڏهن ته 2022 ۾ يونيورسٽيون پڻ عورتن لاءِ بند ڪيون ويون هيون.