ويسٽ انڊيز ٻن ٽيسٽ ميچن جي سيريز جي آخري ٽيسٽ ۾ پاڪستان خلاف پهرين ڏينهن جي راند جي پڄاڻي تي 5 وڪيٽن تي 239 رنس ٺاهي ورتا
پورٽ آف اسپين ۾ کيڏي ويندڙ ٽيسٽ ۾ ويسٽ انڊيز جي ٽيم پاڪستان خلاف ٽاس کٽي پهريان بيٽنگ ڪرڻ جو فيصلو ڪيو.
ٻئي ٽيسٽ ۾ پاڪستاني ٽيم 4 تبديلين سان ميدان ۾ لٿي، جڏهن ته ويسٽ انڊيز جي ٽيم ۾ ڪا به تبديلي نه ڪئي وئي.
عبدالله شفيق، اويس ظفر، ساجد خان ۽ عبيد شاهه کي ٽيم ۾ شامل ڪيو ويو آهي. پاڪستان طرفان عبيد شاهه ۽ اويس ظفر ڊيبيو ڪري رهيا آهن، عبيد شاهه کي محمد عباس جڏهن ته اويس ظفر کي بابر اعظم ڊيبيو ڪيپ ڏني.
برسات سبب راند 15 منٽ دير سان شروع ٿي. پهرين سيشن ۾ رڳو 9.5 اوورن جي راند ممڪن ٿي سگهي، جنهن ۾ تيج نرائن چندرپال 15 رنس ٺاهي آئوٽ ٿيو. ويسٽ انڊيز جو اسڪور هڪ وڪيٽ تي 49 رنس رهيو.
ٻئي سيشن ۾ پاڪستاني بالرن وڌيڪ 3 وڪيٽون حاصل ڪيون، برينڊن ڪنگ 46، ڪيوم هوج 10 ۽ عامر جنگو 26 رنس ٺاهي آئوٽ ٿيا. ٽئين سيشن ۾ شائي هوپ پڻ 29 رنس اسڪور ڪري محمد علي جو ٻيو شڪار بڻيو، پنجين وڪيٽ لاءِ جسٽن گريوز سان سندس 53 رنسن جي ڀائيواري رهي.
خراب روشني سبب جڏهن راند وقت کان اڳ ختم ڪئي وئي ته ويسٽ انڊيز 74 اوورن ۾ 5 وڪيٽن تي 239 رنس ٺاهي چڪو هو. ويسٽ انڊيز طرفان جسٽن گريوز 64 ۽ ڪپتان روسٽن چيس 36 رنسن تي ناٽ آئوٽ آهن.
پاڪستان طرفان محمد علي 2، جڏهن ته ساجد خان، عبيد شاهه ۽ علي عثمان هڪ، هڪ وڪيٽ حاصل ڪئي.
