پاڪستاني ڊراما انڊسٽري سان لاڳاپيل اداڪار عباس اشرف چيو آهي ته سندس وڏي ڀاءُ ۽ مشهور اداڪار عمران اشرف ڪيريئر ٺاهڻ ۾ سندس ڪا به مدد نه ڪئي
تازو هڪ انٽرويو دوران عباس اشرف اداڪاري ۽ پنهنجي ڪيريئر بابت ڳالهائيندي چيو ته هو هميشه کان اداڪار بڻجڻ چاهيندو هو، پر شروعاتي ڏينهن ۾ سندس والده کي ان تي اعتراض هو، جيتوڻيڪ عمران اشرف اڳ ئي هن شعبي سان لاڳاپيل هو.
عباس اشرف ٻڌايو ته سندس والده هڪ ڀيري فون ڪري چيو ته هن خانه ڪعبه سامهون بيهي دعا گهري آهي ته هو اداڪاري ڇڏي ڪنهن ٻئي شعبي سان لاڳاپيل ٿي وڃي، جنهن تي هن کلندي جواب ڏنو ته اها دعا قبول ٿي وئي، ڇو ته کيس هڪ ٽي وي چينل مان آفر ملي وئي آهي.
هڪ ٻئي سوال جي جواب ۾ عباس اشرف چيو ته جڏهن هن پنهنجي وڏي ڀاءُ عمران اشرف کان انڊسٽري ۾ متعارف ڪرائڻ لاءِ مدد گهري ته هن انڪار ڪندي چيو، "پنهنجي محنت سان اچ، مان به پنهنجي محنت سان هتي پهتو آهيان." عباس موجب، ان ڳالهه کان پوءِ هن وڌيڪ محنت ڪئي، مختلف ڪمرشلز ۾ ڪم ڪيو ۽ هاڻي ڊرامن ۾ اداڪاري ڪري رهيو آهي.
