نئين دهلي: ايئر انڊيا جي فوڪيٽ کان نئين دهلي ويندڙ پرواز جي ڪپتان جي ڊوپ ٽيسٽ ۾ چرس واپرائڻ جي تصديق ٿي وئي آهي

ڀارتي ميڊيا موجب ٿائيلينڊ جي سياحتي ٻيٽ فوڪيٽ کان دهلي ايندڙ ايئر انڊيا جي پرواز جي ڪپتان جو ٻيو ڊوپ ٽيسٽ پڻ مثبت آيو آهي.

ڀارتي ميڊيا جي رپورٽ موجب 4 آگسٽ تي ايئر انڊيا جي پرواز AI-2379، جنهن ۾ 137 مسافر ۽ عملي جا 8 ڄڻا سوار هئا، فوڪيٽ کان دهلي اچي رهي هئي ته دورانِ پرواز ان جي اوچائي اوچتو 300 فوٽ گهٽجي وئي. هن واقعي ۾ گهٽ ۾ گهٽ 20 مسافر ۽ عملي جا 4 ڄڻا زخمي ٿيا.

ذريعن ڀارتي ميڊيا کي واقعي جا تفصيل ٻڌائيندي چيو ته جڏهن جهاز اوچتو 300 فوٽ هيٺ آيو ته جهاز جو ڪپتان پنهنجي سيٽ تي موجود نه هو، جڏهن ته ان وقت جهاز جو ڪنٽرول فرسٽ آفيسر وٽ هو.

ڀارتي ميڊيا موجب پرواز جي لينڊنگ کانپوءِ نئين دهلي ۾ ڪيل اسڪريننگ دوران جهاز جي ڪپتان جي جسم ۾ نشي آور شين جي موجودگي ظاهر ٿي هئي.

ڪجهه عرصي کانپوءِ هڪ ٻيو ٽيسٽ ڪيو ويو ۽ اڱاري ڏينهن ذريعن ٻڌايو ته اهو ٽيسٽ پڻ مثبت آيو آهي. خاص طور تي ٽيسٽ مان تصديق ٿي آهي ته پائلٽ چرس واپرائي هئي.

ڀارت جي سول ايوي ايشن واري وزارت پنهنجي بيان ۾ چيو ته ايئرڪرافٽ ايڪسيڊنٽ انويسٽيگيشن بيورو واقعي جي وڌيڪ جاچ شروع ڪري ڇڏي آهي.

ڀارتي ايئر لائن طرفان هن وقت تائين ڪو به بيان جاري ناهي ڪيو ويو.