ڪينبرا (ويب ڊيسڪ) آسٽريليا پنهنجي فوج جي 125 سالن جي تاريخ ۾ پهريون ڀيرو هڪ عورت کي آرمي چيف مقرر ڪري ڇڏيو آهي.

پرڏيهي ميڊيا موجب آسٽريليا جي حڪومت دفاعي قيادت ۾ تبديلي ڪندي ليفٽيننٽ جنرل سوزان ڪوئل کي آرمي چيف مقرر ڪيو آهي، جنرل سوزان ڪوئل هلندڙ سال جولاءِ ۾ ليفٽيننٽ جنرل سائمن اسٽيورٽ جي جاءِ تي پنهنجون ذميواريون سنڀاليندي.

ليفٽيننٽ جنرل سوزان ڪوئل جو فوجي ڪيريئر 40 سالن تي ٻڌل آهي، جنهن دوران هن افغانستان آپريشن ۽ وچ اوڀر ۾ مقرري سميت ڪيترن ئي اعليٰ عهدن تي خدمتون انجام ڏنيون.

پرڏيهي ميڊيا موجب جنرل سوزان جي مقرري آسٽريلين آرمي ۾ عورت آفيسرن جو انگ وڌائڻ ڏانهن هڪ اهم قدم آهي، جتي عورت اهلڪارن کي هراسان ڪرڻ جا واقعا به سامهون ايندا رهندا آهن.

ياد رهي ته هن وقت آسٽريليا جي دفاعي فورسز ۾ عورت اهلڪارن جو انگ 21 سيڪڙو آهي، جڏهن ته اعليٰ عهدن تي خدمتون انجام ڏيندڙ عورت آفيسرن جو انگ 18.5 سيڪڙو آهي. آسٽريلين دفاعي فورسز 2030 تائين فورسز ۾ عورتن جي مجموعي شموليت جو هدف 25 سيڪڙو مقرر ڪيو آهي.