بيلجيم جي جنگلات ۾ لڳل باهه 3 هزار هيڪٽر ايراضي کي پنهنجي لپيٽ ۾ آڻي ڇڏيو آهي ۽ هاڻي اها باهه جرمني جي سرحد ڏانهن وڌي رهي آهي. پرڏيهي ميڊيا موجب بيلجيم ۾ تاريخ جي بدترين جنگلاتي باهه تي ضابطو آڻڻ لاءِ هيليڪاپٽر، فائر فائٽرز، فوج ۽ مقامي آبادگار ڪوششن ۾ مصروف آهن. مقامي اختيارين انخلا ڪندڙ شهرين کي في الحال پنهنجن گهرن ڏانهن واپس نه وڃڻ جي هدايت ڪئي آهي. اختيارين جو چوڻ آهي ته جرمني ڏانهن وڌندڙ باهه تي ضابطو آڻڻ جي ڪوشش ڪئي پئي وڃي. يورپي فاريست فائر انفارميشن سسٽم موجب اها بيلجيم ۾ رڪارڊ ڪيل سڀ کان وڏي جنگلاتي باهه آهي، جيڪا 2011ع ۾ لڳل باهه کان به ٻيڻي کان وڌيڪ آهي. واضح رهي ته يورپ ۾ شديد گرمي ۽ خشڪ سالي سبب جنگلات ۾ باهه لڳڻ جي واقعن ۾ اضافو ٿيو آهي.