اڄ دنيا ۾ فلڪيات جو هڪ ناياب منظر ڏسڻ ۾ ايندو، جتي زمين تي موجود لڳ ڀڳ 99 سيڪڙو آبادي هڪ ئي وقت سج جي روشني يا ان جي هلڪي روشني (ٽوائيلائيٽ) جو تجربو ڪندي.

الجزيره جي رپورٽ موجب، 8 جولاءِ تي دنيا جي لڳ ڀڳ 8.2 ارب ماڻهن مان 99 سيڪڙو ماڻهو هڪ ئي وقت يا ته مڪمل ڏينهن جي روشني ۾ هوندا يا وري ٽوائيلائيٽ جي ٽن مرحلن مان ڪنهن هڪ مرحلي ۾ موجود هوندا.

عام طور تي دنيا جي هڪ حصي ۾ ڏينهن هوندو آهي ته ٻئي حصي ۾ رات، پر اڄ تقريباً هڪ منٽ لاءِ اهڙي صورتحال پيدا ٿيندي، جڏهن دنيا جي وڏي اڪثريت سج جي روشني يا ان جي هلڪي روشني مان فائدو وٺندي.

ماهرن موجب، اهو منفرد منظر زمين جي جهڪاءَ (Earth's Tilt) ۽ اتر اڌ گولي ۾ جاري اونهاري جي موسم سبب ممڪن ٿيندو.

هن دوران اتر آمريڪا، ڏکڻ آمريڪا، يورپ، آفريڪا ۽ ايشيا جا گهڻا علائقا ڏينهن جي روشني ۾ هوندا، جتي دنيا جي آبادي جو وڏو حصو رهندو آهي.

جڏهن ته آسٽريليا، نيوزيلينڊ، ڏکڻ اوڀر ايشيا جا ڪجهه علائقا، انٽارڪٽيڪا ۽ ڀرپاسي وارا سامونڊي علائقا رات جي حالت ۾ رهندا.

پرڏيهي ميڊيا موجب، هر سال لڳ ڀڳ 18 مئي کان 17 جولاءِ تائين تقريباً 60 ڏينهن اهڙي قسم جي صورتحال پيدا ٿيندي آهي، جڏهن دنيا جي لڳ ڀڳ 99 سيڪڙو آبادي هڪ ئي وقت ڏينهن يا ٽوائيلائيٽ جو تجربو ڪندي آهي.