چنڊي ڳڙهه جي مقامي عدالت اداڪار سلمان خان، سندس ڀيڻ الويرا خان اگني هوٽري ۽ اسٽائل اينڊ ڪنٽينٽ جيولري پرائيويٽ لميٽيڊ جي ڊائريڪٽرن کي مبينا ٺڳيءَ واري ڪيس ۾ طلب ڪري ورتو آهي
ڀارتي ميڊيا موجب عدالت سڀني جوابدارن کي 5 آڪٽوبر تي پيش ٿي الزامن بابت پنهنجو جواب جمع ڪرائڻ جو حڪم ڏنو آهي.
ڀارتي ميڊيا موجب هي ڪيس چنڊي ڳڙهه جي واپاري ارون گپتا جي درخواست تي داخل ڪيو ويو، جنهن جو چوڻ آهي ته کيس "Being Human" جيولري شوروم کولڻ لاءِ ڪوڙا واعدا ڪري راضي ڪيو ويو، جنهن سبب کيس ڪيترن ئي ڪروڙ رپين جو نقصان برداشت ڪرڻو پيو.
درخواست موجب ارون گپتا شوروم قائم ڪرڻ لاءِ لڳ ڀڳ 3 ڪروڙ رپيا سيڙپڪاري ڪئي، جن مان 1 ڪروڙ رپيا صرف شوروم جي تعمير ۽ تياري تي خرچ ٿيا.
شڪايت ۾ چيو ويو آهي ته شوروم کلڻ کان پوءِ ڪمپني واعدي موجب ڪاروباري سهڪار فراهم نه ڪيو، جڏهن ته فيبروري 2020 کان جيولري فراهم ڪندڙ اسٽور بند ٿيڻ سبب ڪاروبار سخت متاثر ٿيو.
درخواست ۾ الزام لڳايو ويو آهي ته ڪمپني سان لاڳاپيل 6 ڄڻن غلط ڄاڻ ڏئي سيڙپڪاري ڪرائي.
ٻئي پاسي ڪمپني اڳ ئي انهن الزامن جي ترديد ڪري چڪي آهي. ڪمپني جو چوڻ آهي ته 2018 واري معاهدي ۾ سلمان خان جو سڌو سنئون ڪو به ڪردار نه هو، جڏهن ته سلمان خان فائونڊيشن 2015 ۾ صرف "Being Human" برانڊ جو لائسنس ڏنو هو، جڏهن ته جيولري جي ڪاروبار جي سموري ذميواري ڪمپني تي هئي.
ڀارتي ميڊيا موجب هن ڪيس جي ايندڙ ٻڌڻي 5 آڪٽوبر تي ٿيندي.
