نامور ڀارتي دفاعي تجزيه نگار ۽ اڳوڻي ڀارتي فوجي پراوين سواهنِي آپريشن سندور جي حوالي سان ٺاهيل ڀارتي دستاويزي فلم جي حقيقت آشڪار ڪري ڇڏي. ڀارت تازو ئي مئي 2025 ۾ ٿيل نام نهاد آپريشن سندور بابت هڪ ڊاڪيومينٽري فلم جاري ڪئي، جنهن ۾ حقيقتن جي ابتڙ ڀارتي فوج جي برتري ڏيکاري وئي، جڏهن ته پاڪ فوج جي شعبي تعلقات عامه آءِ ايس پي آر نام نهاد آپريشن سندور تي ڀارتي ڊاڪيومينٽري کي حقيقتن کي مسخ ڪرڻ جي ڪوشش قرار ڏيندي چيو ته ڀارت معرڪه حق ۾ شڪست تسليم ڪرڻ کان انڪاري آهي.

ان حوالي سان نامور ڀارتي دفاعي تجزيه نگار ۽ ليکڪ پراوين سواهنِي سوشل ميڊيا تي جاري بيان ۾ لکيو ته هو ڀارت ۽ پاڪستان وچ ۾ جنگين تي ٺهيل فلمون نٿو ڏسي، پر سوشل ميڊيا تي ان حوالي سان پوسٽون، تجزيا ۽ وڊيو ڪلپس ضرور ڏسي وٺندو آهي. هن چيو ته جيڪو شخص انهن جنگين کي سمجهي ٿو، اهو ڄاڻي ٿو ته اهڙيون سڀئي فلمون حقيقت کان پري، انتهائي هڪ طرفيون ۽ وڏين خامين سان ڀريل هونديون آهن.

پراوين سواهنِي وڌيڪ چيو ته هو اهو به ڄاڻي ٿو ته اهي فلمون ڇو ٺاهيون وڃن ٿيون: ڀارتي فوج کي پاڪستاني فوج کان برتر ڏيکارڻ، هائپر نيشنل ازم کي هٿي ڏيڻ ۽ اڻ سڌي طرح ڀارتي عوام کي اهو يقين ڏيارڻ لاءِ ته ڀارتي فوج احتساب کان مٿانهين آهي. ڀارتي دفاعي تجزيه نگار جو چوڻ هو ته گذريل 12 سالن کان گهڻا ڀارتي هڪ خيالي دنيا ۾ رهي رهيا آهن، ۽ جيڪي ماڻهو ان خيالي دنيا جو حصو ٿيڻ نٿا چاهين، انهن کي هاڻي ”ذهني نڪسل“ چيو وڃي ٿو. هن عوام کي اپيل ڪئي ته هو خواب غفلت مان جاڳن، ڇو ته وقت تيزي سان تبديل ٿي رهيو آهي ۽ حالتون 2029 کان اڳ وڏي تبديلي ڏانهن وڌي رهيون آهن.