تل ابيب (ويب ڊيسڪ) اسرائيلي بچاءَ واري وزير اسرائيل ڪاتز چيو آهي ته اسرائيلي فوج ايران جي هڪ وڏي پيٽروڪيميڪل پلانٽ کي نشانو بڻايو آهي.

جاري ڪيل بيان ۾ اسرائيلي بچاءَ واري وزير چيو ته فوج کي هدايت ڏني وئي آهي ته ايران جي انفرااسٽرڪچر تي پوري طاقت سان حملا جاري رکيا وڃن.

هن چيو ته اسرائيلي فوج اساليه ۾ ايران جي اهم پيٽروڪيميڪل ڍانچي تي وڏو حملو ڪيو آهي.

سندس چوڻ هو ته گذريل هفتي به هڪ ٻي پلانٽ تي حملو ڪيو ويو هو.

اسرائيل ڪاتز وڌيڪ چيو آهي ته ”هاڻي اهي ٻئي پلانٽ، جيڪي گڏجي ايران جي لڳ ڀڳ 85 سيڪڙو پيٽروڪيميڪل برآمدات جون ذميوار هيون، سروس کان ٻاهر ٿي ويون آهن ۽ ڪم نه پيون ڪن.“

اسرائيل ڪاتز موجب، اساليه ۾ موجود اهو پلانٽ ملڪ جي اٽڪل اڌ پيٽروڪيميڪل پيداوار جو ذريعو هو.

ٻئي پاسي ايراني خابرو اداري تسنيم به رپورٽ ڪيو آهي ته ٻن پيٽروڪيميڪل ڪمپنين تي حملو ڪيو ويو آهي.

بوشهر جي نائب گورنر موجب حملن کانپوءِ نقصان جو مڪمل ڪاٿو لڳائڻ جو عمل جاري آهي.

ايراني ميڊيا موجب، ڪيترن ئي پيداواري يونٽن کي نقصان پهتو آهي، جڏهن ته حملي ۾ ڪنهن جاني نقصان جي اطلاع ناهن مليا.