اسرائيل جي قومي سلامتي واري صلاحڪار اتمار بن گوير جو چوڻ آهي ته اسرائيلي فوج کي غزه ۾ هر رات 30 کان 40 ماڻهن کي قتل ڪرڻ گهرجي. اسرائيل جي انتهائي ساڄي ڌر سان تعلق رکندڙ قومي سلامتي واري وزير اتمار بن گوير هڪ انٽرويو ۾ غزه جي ماڻهن بابت اشتعال انگيز بيان ڏيندي چيو ته اسرائيلي فوج کي غزه ۾ هر رات 30 کان 40 ماڻهن کي قتل ڪرڻ گهرجي. اتمار بن گوير چيو ته اسرائيلي فوج کي اها ڪارروائي صرف انهن ماڻهن تائين محدود نه رکڻ گهرجي، جيڪي خطرو بڻجن ٿا. اسرائيلي وزير جو چوڻ هو ته غزه ۾ ڪجهه اهڙا ماڻهو به آهن، جيڪي زنده رهڻ جي قابل ناهن، انهن ماڻهن کي زنده نه رهڻ گهرجي، اهي انسان ئي ناهن. اسرائيلي وزير جي اشتعال انگيز بيان تي ردعمل ڏيندي ايران جي نائب پرڏيهي وزير ڪاظم غريب آبادي چيو ته اسرائيلي قومي سلامتي واري وزير غزه ۾ قتلِ عام لاءِ روزانو 30 کان 40 ماڻهن جي حد مقرر ڪري ڇڏي آهي. ايراني نائب پرڏيهي وزير چيو ته صهيوني مجرم هڪ ئي وقت فلسطيني ماڻهن جي بي دخلي ۽ يهودي آبادين جي تعمير جي ڳالهه ڪري رهيو آهي، انهن اعترافن کي ثبوت طور محفوظ ۽ رڪارڊ ۾ رکڻ گهرجي ته جيئن انهن کي اسرائيلي مجرمن جي احتساب ۽ مقدمي جي وقت پيش ڪري سگهجي.