جاپان ۾ هڪ 15 ورهين جي هاءِ اسڪول جي شاگرد کي مبينا طور چيٽ جي پي ٽي جي مدد سان اهڙو سافٽ ويئر تيار ڪرڻ جي الزام ۾ گرفتار ڪيو ويو آهي، جنهن ذريعي بانڊائي نامڪو فلم ورڪس جي اسٽريمنگ سروس بانڊائي چينل تي سائبر حملو ڪيو ويو.

پرڏيهي ميڊيا موجب هن حملي سبب سروس جا آپريشن متاثر ٿيا ۽ 46 هزار کان وڌيڪ صارفين جا اڪائونٽس ڊليٽ ٿي ويا.

پوليس موجب نومبر 2025ع ۾ نوجوان تي آن لائن اسٽريمنگ سروس خلاف فراڊ ذريعي ڪاروباري سرگرمين ۾ رڪاوٽ وجهڻ جو شڪ آهي.

جاچ ڪندڙ اختيارين جو چوڻ آهي ته نوجوان پليٽ فارم جي سيڪيورٽي سسٽم ۾ موجود ڪمزوري جو فائدو وٺندي حملو ڪيو، جنهن کانپوءِ ڪمپني کي پنهنجي سروس جا ڪجهه حصا عارضي طور بند ڪرڻا پيا.

شاگرد ٻڌايو ته هن چوٿين جماعت کان ڪمپيوٽر استعمال ڪرڻ شروع ڪيو، سورس ڪوڊ پاڻ تيار ڪيو، پر پروسيسنگ ۾ گهڻو وقت لڳڻ سبب چيٽ جي پي ٽي کان مدد ورتي ۽ ڪوڊ کي مختلف پروگرامنگ ٻولين ۾ مڪمل ڪيو.

پوليس موجب جوابدار پڇا ڳاڇا دوران اعتراف ڪيو ته سندس بانڊائي نامڪو فلم ورڪس سان ڪا ذاتي دشمني نه هئي، هن صرف ان ڪري پليٽ فارم کي نشانو بڻايو، ڇاڪاڻ ته اتي ڪيترائي اڪائونٽس موجود هئا، جن ۾ هو لاگ اِن ڪري سگهيو.