بالي ووڊ اداڪارا ۽ ڀارتي پارليامينٽ جي ميمبر ڪنگنا رناوت ڀارت جي جين زي کي ’گٽر جنريشن‘ چوڻ واري بيان تان يوٽرن وٺي ڇڏيو
ڀارتي ميڊيا موجب ڪنگنا رناوت ڪجهه ڏينهن اڳ نئين دهلي جي جنتر منتر تي ٿيندڙ شاگردن جي احتجاج بابت سماجي رابطن واري پليٽ فارم انسٽاگرام تي پنهنجا خيال ظاهر ڪندي جين زي کي ’گٽر جنريشن‘ قرار ڏنو هو.
ڪنگنا جي ان بيان کانپوءِ نه رڳو سوشل ميڊيا صارفين پر انڊسٽري جي مشهور شخصيتن پاران پڻ کيس تنقيد جو نشانو بڻايو ويو هو.
بهرحال، هاڻي اداڪارا پنهنجي ان بيان تان يوٽرن وٺندي جين زي کي ملڪ جي سڀ کان وڏي طاقت قرار ڏنو آهي.
خبرون ڏيندڙ اداري پي ٽي آءِ سان ڳالهائيندي اداڪارا چيو ته ’جنريشن زي‘ اسان جي ملڪ جي طاقت ۽ اسان جي قوم جو عظيم اثاثو آهي.
هن چيو ته اسان کي ان ڳالهه تي تمام گهڻي خوشي آهي ته اسان جا نوجوان تيزي سان اسان جي ثقافت ۽ ان جي سڃاڻپ جي سفير طور سامهون اچي رهيا آهن.
ڪنگنا وڌيڪ چيو ته اسان کي موهن ڀاڳوت جي ڳالهه ٻڌڻ جو موقعو پڻ مليو، جن کي اسان انتهائي احترام جي نظر سان ڏسون ٿا. اها انتهائي خوشي جي ڳالهه آهي ته ملڪ جا نوجوان اسان سان ڳنڍجي رهيا آهن ۽ اسان جي ثقافتي سڃاڻپ کي اختيار ڪري رهيا آهن.
