ٻارن کي سوشل ميڊيا جي محدود استعمال جي اجازت بابت عالمي سطح تي بحث جاري آهي، ۽ ان حوالي سان شوبز، سياست ۽ ٽيڪنالاجي سان تعلق رکندڙ اهم شخصيتون به گهڻي حد تائين هڪ ئي راءِ تي نظر اچن ٿيون.

دنيا جي مختلف ملڪن ۾ جتي ٻارن جي سوشل ميڊيا استعمال تي قانون سازي تي غور ڪيو پيو وڃي، اتي ڪيترن ئي اڳواڻن ۽ ماهرن به ان ڳالهه جي حمايت ڪئي آهي ته ٻارن جي اسڪرين ٽائيم کي محدود ڪيو وڃي. اڳوڻي آمريڪي صدر باراڪ اوباما پنهنجي ڌيئرن کي فيس بڪ کان پري رکيو، جڏهن ته برطانوي شاهي خاندان به ٻارن جي اسڪرين ٽائيم تي سخت پابندين جي حق ۾ آهي.

ٽيڪنالاجي جي وڏن نالن بل گيٽس، اسٽييو جابز ۽ مارڪ زڪربرگ به ٻارن جي بيحد اسڪرين استعمال جي خلاف رهيا آهن. اهڙي طرح يوٽيوب ۽ گوگل جي قيادت سان لاڳاپيل شخصيتون جهڙوڪ نيل موهن، سوسن ووجيڪڪي ۽ سندر پچائي به ٻارن جي ڊجيٽل رسائي کي محدود ڪرڻ ۽ 14 سالن کان اڳ اسمارٽ فون نه ڏيڻ جي حمايت ڪن ٿا.

شوبز دنيا سان لاڳاپيل جارج ڪلوني، ڪيرا نائٽلي ۽ شڪيرا سميت ڪيترائي عالمي ستارا به ان خيال جي حمايت ڪن ٿا ته ٻارن کي سوشل ميڊيا کان پري رکيو وڃي يا انهن جي رسائي سختي سان محدود هجي.

ڊجيٽل دور ۾ جڏهن سوشل ميڊيا ٻارن جي زندگي جو لازمي حصو بڻجي رهيو آهي، تڏهن به دنيا جا ڪيترائي مشهور سياستدان، ٽيڪنالاجي جا وڏا نالا ۽ شوبز شخصيتون ان جي استعمال بابت وڌيڪ محتاط ۽ محدود پاليسي جي حمايت ڪن ٿا.