ميٽا آرٽيفيشل انٽيليجنس (AI) جي ميدان ۾ پنهنجي پوزيشن مضبوط ڪرڻ ۽ صارفين جي انگيجمينٽ وڌائڻ لاءِ فيس بڪ ۾ اهم تبديليون متعارف ڪرائي ڇڏيون آهن. ڪمپني پنهنجي هڪ بلاگ پوسٽ ۾ ڪيترن ئي نون AI فيچرز جو اعلان ڪيو آهي، جيڪي صارفين جي سرچ، مواد تيار ڪرڻ ۽ ٻين ماڻهن سان رابطي جي انداز کي تبديل ڪندا.

انهن نون فيچرز مان سڀ کان اهم "AI موڊ" آهي، جيڪو فيس بڪ تي سرچ ڪرڻ جو طريقو مڪمل طور تبديل ڪري ڇڏيندو. هن فيچر تحت ميٽا AI فيس بڪ جي پبلڪ پوسٽن مان معلومات گڏ ڪري صارفين جي سوالن جا جواب فراهم ڪندو. هاڻي صارفين کي مختلف سرچ رزلٽس ۾ اسڪرول ڪرڻ بدران سادي ٻولي ۾ سوال پڇڻو پوندو ۽ AI کين لاڳاپيل جواب پيش ڪندو.

ماهرن جو چوڻ آهي ته هن فيچر سان معلومات تائين رسائي وڌيڪ تيز ۽ آسان ٿي ويندي، جڏهن ته اهو ڏسڻو پوندو ته AI پاران مهيا ڪيل جواب ڪيتري حد تائين درست ۽ قابل اعتماد هوندا، ڇاڪاڻ ته اهي عام صارفين جي پوسٽن جي بنياد تي تيار ڪيا ويندا.

ان کان علاوه، ميٽا فيس بڪ لاءِ نوان وڊيو ايڊيٽنگ ٽولز پڻ متعارف ڪرايا آهن، جن سان صارف پنهنجي وڊيوز کي وڌيڪ پروفيشنل ۽ پرڪشش بڻائي سگهندا. هڪ ٻيو دلچسپ فيچر AI تي ٻڌل فوٽو پري سيٽس آهي، جنهن ذريعي صارف پاڻ کي مختلف لباسن، هيئر اسٽائلز ۽ ٻين اندازن ۾ ڏسي سگهندا.

واضح رهي ته گذريل ڪجهه مهينن دوران به فيس بڪ ۾ ڪيترائي AI فيچرز شامل ڪيا ويا آهن. مثال طور فيبروري 2026ع ۾ اينيميٽيڊ پروفائل فوٽوز جو فيچر متعارف ڪرايو ويو هو، جنهن جي مدد سان جامد تصويرن کي متحرڪ بڻائي سگهجي ٿو.

ميٽا جو چوڻ آهي ته AI تي ٻڌل اهي نيون سهولتون فيس بڪ کي وڌيڪ جديد، سمارٽ ۽ صارف دوست بڻائڻ ۾ اهم ڪردار ادا ڪنديون.