ايراني پاسداران انقلاب جي ترجمان بريگيڊيئر جنرل حسين محبي دعويٰ ڪئي آهي ته رمضان ۾ ايران تي مڙهيل جنگ کانپوءِ هاڻي خليج فارس ۾ هڪ به آمريڪي جنگي جهاز موجود ناهي

پنهنجي بيان ۾ بريگيڊيئر جنرل حسين محبي چيو ته ايران تي مڙهيل جنگ دوران خليج فارس ۾ آمريڪا جا 30 کان 40 جنگي جهاز موجود هئا، جڏهن ته ماضي ۾ ٿيل ايران عراق جنگ دوران آمريڪا خليج فارس ۾ 100 کان وڌيڪ جنگي جهاز آندا هئا، تنهن هوندي به هن وقت خليج فارس ۾ آمريڪا جو هڪ به جهاز موجود ناهي.

جنرل محبي چيو ته جنگ دوران ايران جي ردعمل سبب دشمن کي نقصان برداشت ڪرڻو پيو آهي.

پاسداران انقلاب جي ترجمان چيو ته آمريڪا ايران جي سائوٿ پارس گيس فيلڊ ۽ اسالويه انرجي حب تي بمباري ڪئي هئي، جنهن جو جواب آمريڪا، اسرائيل ۽ انهن جي اتحادين تي اهڙن حملن سان ڏنو ويو، جو آمريڪا لاءِ اها جنگ ساڳئي طاقت سان جاري رکڻ ڏکيو ٿي ويو.

ترجمان ڌمڪي ڏني ته جيڪڏهن ايران کي ٻيهر خطرن کي منهن ڏيڻو پيو ته خطي ۾ سمورن آمريڪي ۽ غير آمريڪي توانائي نظامن ۽ انٽرنيٽ سان ڳنڍيل عالمي انفرااسٽرڪچر کي تباهه ڪيو ويندو.

تنهن هوندي به پاسداران انقلاب ايران جي ناڪابندي ڪندڙ آمريڪي جنگي جهازن بابت وڌيڪ تفصيل فراهم نه ڪيا.