آمريڪي توانائي واري وزير دعويٰ ڪئي آهي ته آبنائے هرمز مان تيل جي فراهمي روزانو 90 لک بيرل جي ويجهو پهچي وئي آهي

آمريڪي توانائي واري وزير ڪرس رائٽ دعويٰ ڪئي آهي ته آبنائے هرمز ذريعي تيل جي فراهمي سراسري طور تقريبن روزانو 90 لک بيرل تائين پهچي وئي آهي. اها اڳڀرائي آمريڪي فوج ۽ خليجي اتحادي ملڪن جي گڏيل ڪوششن سبب ممڪن ٿي آهي.

ڪرس رائٽ سماجي رابطن واري ويب سائيٽ ايڪس تي پنهنجي بيان ۾ چيو ته وڌيڪ 50 کان 70 لک بيرل روزانو تيل جديد پائپ لائنن ۽ برآمدي سهولتن ذريعي خطي کان ٻاهر موڪليو پيو وڃي، جنهن کانپوءِ خطي مان تيل جي مجموعي فراهمي تقريبن ڏيڍ ڪروڙ بيرل روزانو بڻجي ٿي.

آمريڪي توانائي واري وزير موجب صرف آچر جي ڏينهن خليجي خطي مان 2 ڪروڙ کان وڌيڪ بيرل تيل برآمد ڪيو ويو، جيڪو تڪرار کان اڳ واري سراسري مقدار کان به وڌيڪ آهي.

ان کان اڳ ايراني نيشنل سيڪيورٽي ڪائونسل ايراني شرطن کي تسليم ڪرڻ تائين آبنائے هرمز بند رکڻ جو اعلان ڪيو هو.

ايراني سپريم نيشنل سيڪيورٽي ڪائونسل جي سيڪريٽري محسن رضائي هڪ بيان ۾ چيو ته آبنائے هرمز ان وقت تائين بند رهندي، جيستائين آمريڪا پنهنجو رويو تبديل نه ڪري.