آمريڪي صدر ڊونلڊ ٽرمپ جي غزه بابت جامع منصوبي ۽ فلسطيني رياست کي رد ڪرڻ واري اسرائيلي اعلان تي پاڪستان سميت 8 اسلامي ملڪن سخت ردعمل جو اظهار ڪيو آهي. گڏيل بيان ۾ 8 مسلمان ملڪن اسرائيل جي موقف کي غزه ۾ جنگ جي خاتمي ۽ پائيدار امن جي ڪوششن ۾ سڌي رڪاوٽ قرار ڏنو آهي. پاڪستان، مصر، ترڪي، انڊونيشيا، اردن، قطر، سعودي عرب ۽ گڏيل عرب امارات جي پرڏيهي وزيرن گڏيل بيان ۾ چيو آهي ته اسرائيل طرفان ٽرمپ جي غزه جامع منصوبي جي روڊ ميپ کي رد ڪرڻ، منصوبي تي عملدرآمد کان واضح انڪار آهي. گڏيل بيان موجب غزه روڊ ميپ ۾ اسرائيلي فوج جو انخلا، غزه ۾ بين الاقوامي استحڪامي فورس جي مقرري، غزه جو انتظام قومي ڪميٽي حوالي ڪرڻ ۽ غزه جي ٻيهر تعمير شامل آهي. 8 اسلامي ملڪن آمريڪا کان مطالبو ڪيو آهي ته هو اسرائيل طرفان غزه منصوبي تي مڪمل عملدرآمد يقيني بڻائي. بيان ۾ خبردار ڪيو ويو آهي ته اسرائيل جي انڪار، رڪاوٽ يا دير جي نتيجي ۾ پيدا ٿيندڙ صورتحال جي ذميواري پڻ اسرائيل تي عائد ٿيندي. اسلامي ملڪن فلسطيني رياست جي قيام کان انڪار جي هر ڪوشش رد ڪندي چيو آهي ته 1967ع جي سرحدن تي آزاد ۽ خودمختيار فلسطيني رياست جو قيام ئي خطي ۾ پائيدار امن ۽ استحڪام جي بنياد بڻجي سگهي ٿو، جنهن جو گاديءَ جو هنڌ اوڀر بيت المقدس هجي. ياد رهي ته گذريل ڏينهن اسرائيلي وزيراعظم نيتن ياهو غزه بابت آمريڪي صدر ڊونلڊ ٽرمپ جي بورڊ آف پيس جي 15 نقاطي منصوبي کي رد ڪري ڇڏيو هو. اسرائيلي ميڊيا موجب نيتن ياهو غزه پيس بورڊ جي 15 نقاطي دستاويز کي رد ڪندي چيو ته اسرائيلي فوج غزه مان ان وقت تائين ڪنهن به قسم جو انخلا نه ڪندي، جيستائين حماس کي حقيقي طور غير مسلح نه ڪيو وڃي. نيتن ياهو جو چوڻ هو ته اسرائيل حماس جي رڳو ظاهري يا فرضي ڪمزوري نه، پر ان جي حقيقي فوجي صلاحيتن جو مڪمل خاتمو چاهي ٿو.