لاهور: پاڪستان ڪرڪيٽ بورڊ (پي سي بي) ويسٽ انڊيز خلاف جاري ٽيسٽ سيريز ۽ ايندڙ انگلينڊ خلاف 3 ٽيسٽ ميچن جي سيريز لاءِ قومي اسڪواڊ ۾ ٻن تبديلين جو اعلان ڪري ڇڏيو.

اوپننگ بيٽر عبدالله فضل انجري سبب اڻفٽ قرار ڏنو ويو آهي، جنهن کان پوءِ عبدالله شفيق کي سندس جاءِ تي اسڪواڊ ۾ شامل ڪيو ويو آهي.

پي سي بي موجب، عبدالله فضل جو انجري کان پوءِ ايم آر آءِ اسڪين ڪرايو ويو، جنهن کان پوءِ طبي معائني ۾ کيس ري هيبليٽيشن پروگرام شروع ڪرڻ جو مشورو ڏنو ويو.

انهيءَ سبب هو ويسٽ انڊيز خلاف باقي هڪ ٽيسٽ ميچ ۽ انگلينڊ خلاف 3 ٽيسٽ ميچن جي سيريز مان پڻ ٻاهر ٿي ويو آهي.

ٻئي پاسي سعود شڪيل کي ويسٽ انڊيز خلاف باقي هڪ ميچ لاءِ اضافي بيٽنگ آپشن طور قومي اسڪواڊ ۾ شامل ڪيو ويو آهي، جڏهن ته انگلينڊ خلاف ٽيسٽ سيريز ۾ سندس شموليت فٽنس سان مشروط هوندي.

ويسٽ انڊيز خلاف ٻن ٽيسٽ ميچن جي سيريز کان پوءِ پاڪستان جي ٽيم انگلينڊ رواني ٿيندي، جتي 3 ٽيسٽ ميچن جي سيريز کيڏي ويندي.

ٻنهي ٽيمن وچ ۾ پهريون ٽيسٽ 19 کان 23 آگسٽ تائين هيڊنگلي، ٻيو ٽيسٽ 27 کان 31 آگسٽ تائين لارڊز، جڏهن ته ٽيون ۽ آخري ٽيسٽ 9 کان 13 سيپٽمبر تائين ايجبسٽن ۾ کيڏيو ويندو.

واضح رهي ته ويسٽ انڊيز ۽ پاڪستان وچ ۾ پهريون ٽيسٽ ميچ هن وقت جاري آهي، جتي ويسٽ انڊيز خلاف پهرين ٽيسٽ جي ٻئي ڏينهن پاڪستان اعتماد سان بيٽنگ ڪندي ڏينهن جي پڄاڻي تي ويسٽ انڊيز جي 311 رنسن جي جواب ۾ 199 رنسون ٺاهي ورتيون.