بلڙي شاهه ڪريم: يو آءِ اڳواڻ مولانا راشد محمود سومرو بلڙي شاهه ڪريم ڀرسان يو سي سعيد خان لنڊ ۾ ميڊيا سان ڳالهائيندي چيو آهي ته سنڌ جي ورهاست ڪنهن به صورت قبول ناهي.

هن 27هين آئيني ترميم کي مڪمل طور رد ڪندي واضح ڪيو ته ڪنهن به فرد کي تاحيات قانوني ڇوٽ ڏيڻ نه رڳو قانوني پر مذهبي طور به غلط آهي، ۽ دنيا جي ڪنهن به ملڪ ۾ اهڙي ڪا مثال موجود ناهي.

28هين ترميم بابت هن چيو ته هينئر تائين صرف افواهون هلي رهيون آهن، ۽ باقاعده مسودو سامهون اچڻ کان اڳ ان تي ڳالهائڻ وقت جو ضايع ڪرڻ آهي.

موجوده حڪمرانن تي تنقيد ڪندي راشد محمود چيو ته ملڪ کي لٽيو پيو وڃي ۽ عوام کي صرف بيوقوف بڻايو پيو وڃي.

نئين صوبا ٺاهڻ واري بحث تي راشد محمود چيو ته جيڪڏهن پنجاب ۽ خيبرپختونخواهه جي عوام نوان صوبا گهرن ٿا ته اهي ٺاهي سگهجن ٿا، پر سنڌ جي عوام ورهاڱي کي مڪمل طور رد ڪري ڇڏيو آهي.

ڪراچي ۾ ڪجهه ڌريون مهاجر ڪارڊ استعمال ڪري رهيون آهن، جڏهن ته پيپلز پارٽي 'سنڌ ڪارڊ' کيڏي رهي آهي. راشد محمود موجب حقيقت ۾ انهن ڌرين کي سنڌ سان ڪا به محبت ناهي ۽ اهي صرف پنهنجي سياست کي چمڪائڻ چاهين ٿيون.