ابوظهبي: گڏيل عرب امارات ايران سان سمورا واپاري، ڪاروباري ۽ مالي معاملا ايندڙ حڪم تائين معطل ڪري ڇڏيا آهن

گڏيل عرب امارات جي پرڏيهي وزارت طرفان جاري ڪيل بيان ۾ چيو ويو آهي ته اهو فيصلو خطي ۾ وڌندڙ ڇڪتاڻ جي صورتحال کي نظر ۾ رکندي ڪيو ويو آهي.

اماراتي پرڏيهي وزارت جو چوڻ آهي ته وڌندڙ ڇڪتاڻ علائقائي ۽ عالمي امن ۽ سلامتي کي نقصان پهچائي رهي آهي.

اڱاري ڏينهن گڏيل عرب امارات جي دفاع واري وزارت ٻڌايو هو ته ايران طرفان گڏيل عرب امارات ڏانهن 2 بيلسٽڪ ميزائل فائر ڪيا ويا.

دفاع واري وزارت طرفان جاري ڪيل بيان موجب هڪ ميزائل گڏيل عرب امارات جي سامونڊي حدن اندر، جڏهن ته ٻيو سامونڊي حدن کان ٻاهر ڪري پيو.

اماراتي دفاع واري وزارت وڌيڪ چيو ته گڏيل عرب امارات ڪنهن به قسم جي خطرن کي منهن ڏيڻ لاءِ مڪمل طور تي تيار آهي.