فيفا ورلڊ ڪپ 2026 جي فائنل ۾ دفاعي چيمپيئن ارجنٽينا کي شڪست ڏئي ٻيهر ورلڊ ڪپ کٽيندڙ اسپين جي ٽيم تي ڊالرن جي برسات ٿي وئي. نيويارڪ ۾ کيڏيل سنسني خيز فائنل ۾ اسپين ارجنٽينا کي صفر جي مقابلي ۾ هڪ گول سان شڪست ڏني. راند جو ريگيولر وقت بغير ڪنهن گول جي ختم ٿيو. اضافي وقت جي پهرين هاف ۾ به مقابلو بغير ڪنهن گول جي برابر رهيو. پوءِ اضافي وقت جو ٻيو ۽ فيصلائتو هاف آيو، جنهن جي شروعات ۾ ئي اسپيني رانديگر فيرن ٽوريس کي گول ڪرڻ جو موقعو مليو، جيڪو هن ضايع نه ڪيو، ۽ اهڙي طرح اسپين جي ٽيم 16 سالن کانپوءِ ٻيهر ورلڊ ڪپ چيمپيئن بڻجي وئي. ورلڊ ڪپ 2026 جي فاتح ٽيم اسپين کي 5 ڪروڙ ڊالر انعامي رقم ملي، جڏهن ته گذريل ايڊيشن جي فاتح ٽيم کي 4 ڪروڙ 20 لک ڊالر انعامي رقم ڏني وئي هئي. فيفا ورلڊ ڪپ جي رنر اپ ٽيم ارجنٽينا کي 3 ڪروڙ 30 لک ڊالر انعامي رقم ملي. ان کان علاوه ٽئين نمبر تي آيل ٽيم انگلينڊ کي 2 ڪروڙ 90 لک ۽ چوٿين نمبر واري ٽيم فرانس کي 2 ڪروڙ 70 لک ڊالر مليا. اعلاميي موجب 2026 جي فيفا ورلڊ ڪپ ۾ مجموعي طور 65 ڪروڙ 50 لک ڊالر انعامي رقم ورهائي وئي، جڏهن ته 2022 جي فيفا ورلڊ ڪپ ۾ مجموعي طور 44 ڪروڙ ڊالر انعامي رقم ورهائي وئي هئي.