اسلام آباد: پاڪستان ٽيلي ڪميونيڪيشن اٿارٽي (PTA) موجب ايس ايم ڊبليو 5 (SMW5) بين الاقوامي سب ميرين ڪيبل ۾ پيدا ٿيل خرابي مڪمل طور تي دور ڪئي وئي آهي، جنهن کان پوءِ سڄي ملڪ ۾ انٽرنيٽ سروس بنا ڪنهن رڪاوٽ جي جاري آهي.

ياد رهي ته خميس ڏينهن پاڪستان جي مختلف شهرن ۾ انٽرنيٽ سروس سست ٿيڻ جون شڪايتون سامهون آيون هيون.

انٽرنيٽ ڪنڪٽيويٽي تي نظر رکندڙ اداري ڊائون ڊيٽيڪٽر موجب ملڪ جي ڪيترن ئي شهرن ۾ انٽرنيٽ سروس متاثر ٿي، جنهن سبب صارفين کي ڏکيائين کي منهن ڏيڻو پيو.

پي ٽي اي اڳ پنهنجي بيان ۾ چيو هو ته SEA-ME-WE 5 (SMW5) بين الاقوامي سب ميرين ڪيبل سسٽم ۾ خرابي سبب انٽرنيٽ ٽريفڪ متاثر ٿي هئي، جنهن ڪري ڪجهه صارفين کي وقت بوقت سروس جي معيار ۽ ڪنڪٽيويٽي ۾ مسئلن کي منهن ڏيڻو پيو.

هاڻي پي ٽي اي تصديق ڪئي آهي ته ايس ايم ڊبليو 5 سب ميرين ڪيبل جي خرابي ختم ڪئي وئي آهي ۽ انٽرنيٽ جي فراهمي بنا ڪنهن تعطل جي معمول مطابق جاري آهي.