چين جي خودمختيار خطي اندروني منگوليا سان تعلق رکندڙ 60 ورهين جي خاتون Yin Yuzhen ڏهاڪن کان صحرا ۾ وڻڪاري جو ڪم ڪري رهي آهي.

هن شروعات تڏهن ڪئي جڏهن ڪيترائي سال اڳ هڪ آمريڪي شخص Ronald Sokolsky کيس 5 هزار ڊالر عطيو ڏنا.

هاڻي هن خاتون ان ئي آمريڪي شخص کي دعوت ڏني آهي ته اچي اهو جنگل ڏسي جيڪو سندس عطيي جي مدد سان وجود ۾ آيو.

Yin Yuzhen کي سال 2000 ۾ چين جي اسٽيٽ ڪائونسل طرفان نيشنل ماڊل ورڪر قرار ڏنو ويو هو، ڇو ته هوءَ ڊگهي عرصي کان صحرا کي سرسبز ڪرڻ تي ڪم ڪري رهي آهي.

چين جي صوبي شانشي سان تعلق رکندڙ هڪ غريب گهراڻي مان نڪتل Yin Yuzhen جي شادي 1980 جي ڏهاڪي ۾ اندروني منگوليا جي صحراءِ ماوووس ۾ رهندڙ هڪ شخص سان ٿي.

اهو علائقو چين جي چار وڏن صحراين مان هڪ آهي.

ان وقت کان Yin Yuzhen ۽ سندس مڙس گڏجي وڻڪاري ڪندا رهيا ته جيئن خشڪ سالي جي مسئلن تي قابو پائي سگهجي.

1999 ۾ چين جي سرڪاري ميڊيا ادارو China Central Television (CCTV) هن بابت رپورٽ نشر ڪئي، جنهن بعد آمريڪي شهري Ronald Sokolsky متاثر ٿيو ۽ هن 5 هزار ڊالر عطيو ڏنو.

Yin Yuzhen موجب، هن ڪڏهن ايتري رقم نه ڏٺي هئي، ۽ هن اها رقم ٻج خريد ڪرڻ ۽ وڻ لڳائڻ لاءِ استعمال ڪئي.

هن ٻڌايو ته جڏهن رونالڊ ساکولسڪي آيو ته هن صحرا ۾ وڻ لڳائڻ جو ڪم ڏٺو ۽ چيو ته “ناممڪن، ناممڪن”.

پر ڏهاڪن بعد اهي ٻج 50 هزار کان وڌيڪ وڏن وڻن ۾ تبديل ٿي ويا.

مئي 2026 جي شروعات ۾ Yin Yuzhen هينان جي هڪ اسڪول سان رابطو ڪيو جتي آمريڪي شخص اڳ ۾ انگريزي پڙهائيندو هو، ۽ کيس ڳولڻ جي درخواست ڪئي.

17 مئي تي اسڪول جي وائس پرنسپل آمريڪي شخص سان فون ذريعي رابطو ڪيو ۽ کيس ٻڌايو ته Yin Yuzhen سندس عطيو هڪ جنگل ۾ تبديل ڪري ڇڏيو آهي.

هاڻي اهو واضح ناهي ته Ronald Sokolsky ڪڏهن اتي جو دورو ڪندو، پر Yin Yuzhen اميد رکي ٿي ته هو جلد اچي ڏسي ته سندس عطيو ڪيئن استعمال ٿيو.