آمريڪي جنگ واري وزير پيٽ هيگسيٿ لاطيني آمريڪي ملڪن تي ٻڌل ’آمريڪاز ڪائونٽر ڪارٽيل ڪوليشن‘ جي ميمبرن تي زور ڏنو آهي ته اهي عالمي فوجداري عدالت (آءِ سي سي) کان ڌار ٿي وڃن. پاناما ۾ خطاب ڪندي پيٽ هيگسيٿ چيو ته آءِ سي سي قومي خودمختياري کي نقصان پهچائي رهي آهي ۽ حڪومتن ۽ عدالتن جا اختيار کسڻ جي ڪوشش ڪري رهي آهي. هن اتحاد جي هر ميمبر کي اپيل ڪئي ته هو آءِ سي سي مان نڪري وڃن ۽ عدالت طرفان قومي خودمختياري ۾ مداخلت جي ڪوششن کي رد ڪن. آمريڪي جنگ واري وزير چيو ته ملڪ پنهنجي خودمختياري ۽ دفاع لاءِ پنهنجي فوج استعمال ڪرڻ جي صلاحيت برقرار رکن ۽ غير چونڊيل عالمي بيوروڪريٽن بدران پنهنجي شهرين ۽ آئين آڏو جوابده هجن. ميڊيا رپورٽن موجب تازو عرصي دوران آمريڪا طرفان آءِ سي سي تي دٻاءُ وڌايو ويو آهي. واضح رهي ته آءِ سي سي نومبر 2024 ۾ اسرائيلي وزيراعظم نيتن ياهو ۽ اڳوڻي دفاع واري وزير يوآو گيلنٽ خلاف غزه ۾ مبينا ڏوهن جي الزام ۾ گرفتاري جا وارنٽ جاري ڪيا هئا.