ايران خلاف جنگ ڊگهي ٿيڻ سبب آمريڪي طيارابردار بحري جهاز تي مقرر ڪيترن ئي اهلڪارن پاران خودڪشي جون ڪوششون ڪرڻ جي دعويٰ سامهون آئي آهي. آمريڪي ميڊيا موجب ڊگهي مقرري سبب يو ايس ايس ابراهيم لنڪن تان ڪيترن ئي اهلڪارن سمنڊ ۾ ٽپو ڏيڻ جي ڪوشش ڪئي. هڪ اهلڪار جي گهرواري موجب مسلسل ۽ ڊگهي ڊيوٽي سبب سندس مڙس جهاز تان ٽپو ڏيڻ جي ڪوشش ڪئي، جڏهن ته جهاز جي عملي ڪيترن ئي اهلڪارن کي اهڙو قدم کڻڻ کان روڪيو. رپورٽ ۾ آمريڪي بحري ٻيڙي تي خوراڪ ۽ بنيادي ضرورتن جي شين جي کوٽ جي دعويٰ پڻ ڪئي وئي آهي. ٻئي طرف آمريڪي سينيٽرن واقعن جي جاچ ڪرائڻ جو مطالبو ڪيو آهي، جڏهن ته آمريڪي نيوي جهاز تي مقرر فوجين ۾ خودڪشي جي ڪوششن يا ذهني صحت جي مسئلن ۾ واڌ جي ترديد ڪئي آهي. ميڊيا رپورٽن موجب لڳ ڀڳ 5 هزار آمريڪي سيلرز ۽ ميرينز 250 کان وڌيڪ ڏينهن کان جهاز تي مقرر آهن.