ڀارتي گلوڪار سونو نگم جي سرجري دوران گانو ڳائڻ جي وڊيو وائرل ٿي وئي۔

پرڏيهي ميڊيا موجب سونو نگم پنهنجي سرجري دوران گانو ڳايو، جنهن جي وڊيو هن پنهنجي انسٽاگرام تي شيئر ڪئي، جيڪا تيزي سان وائرل ٿي رهي آهي۔

وائرل وڊيو ۾ گلوڪار 1949ع ۾ ٺهندڙ فلم ’دلاري‘ جو مشهور گانو ’سُهاني رات ڍل چڪي، نه ڄاڻي تون ڪڏهن ايندين‘ ڳايو، اهو گانو ڀارت جي مشهور پلے بیک گلوڪار محمد رفيع ڳايو هو۔

سونو نگم وڊيو جي ڪيپشن ۾ پنهنجي گاني کي ڊاڪٽرن جي نالي ڪندي لکيو ته ’منهنجي سرجري دوران پيارا ڊاڪٽر نليش ست ۽ سندس ٽيم لاءِ هڪ پرفارمنس، درد جي حالت ۾ گائڪي ۽ موسيقي جو لطف‘۔

گلوڪار جي هن وڊيو کي سندس مداحن پاران ساراهيو پيو وڃي، جڏهن ته سونو نگم جي صحتيابي لاءِ دعائون پڻ ڪيون پيون وڃن۔

گلوڪار پنهنجي سرجري بابت تفصيل ٻڌائڻ کان پاسو ڪيو آهي، تنهن هوندي به سندس انسٽاگرام اڪائونٽ تي هڪ وڊيو موجود آهي، جنهن ۾ سونو نگم پنهنجي اعصابي بيماري ۾ مبتلا هجڻ جو انڪشاف ڪيو هو۔