ڪراچي: قومي ڪرڪيٽ ٽيم جي اڳوڻي ڪپتان سرفراز احمد عالمي ڪرڪيٽ تان رٽائرمينٽ جو اعلان ڪري ڇڏيو.

پنهنجي بيان ۾ سرفراز احمد چيو ته پاڪستان جي نمائندگي ڪرڻ مون لاءِ سڀ کان وڏو اعزاز رهيو، 2006 ۾ انڊر 19 ورلڊ ڪپ ۽ 2017 ۾ چيمپيئنز ٽرافي کٽڻ منهنجي ڪيريئر جا يادگار لمحا آهن.

هن چيو ته ساٿي رانديگرن، ڪوچن، گهر ڀاتين ۽ مداحن جو ٿورائتو آهيان، پاڪستان ٽيم جي ٽنهي فارميٽن ۾ قيادت ڪرڻ مون لاءِ خواب جي تعبير هو، مان سدائين سٺي ڪرڪيٽ کيڏي ۽ ٽيم کي متحد بڻائڻ جي ڪوشش ڪئي.

سندس چوڻ هو ته پاڪستان ڪرڪيٽ سدائين منهنجي دل جي ويجهو رهندي ۽ مان هر ممڪن طريقي سان راند جي خدمت ڪندو رهندس.

واضح رهي ته سرفراز احمد پاڪستان لاءِ 54 ٽيسٽ، 117 ون ڊي ۽ 61 ٽي ٽونٽي ميچون کيڏيون، هن مجموعي طور 6164 رنسون ٺاهيون ۽ وڪيٽن پويان 315 ڪيچ ۽ 56 اسٽپمس ڪيا.

سرفراز 100 عالمي ميچن ۾ پاڪستان جي قيادت ڪئي، سندس قيادت ۾ پاڪستان چيمپيئنز ٽرافي 2017 کٽي هئي، جڏهن ته 2006 ۾ سندس قيادت ۾ پاڪستان انڊر 19 ورلڊ ڪپ پڻ کٽيو هو.