Meta Platforms خاموشي سان Facebook سان لاڳاپيل هڪ نئين ايپ متعارف ڪرائي آهي.

“فورم” نالي هن ايپ بابت هڪ رپورٽ ۾ ٻڌايو ويو آهي ته اها هن وقت مخصوص ملڪن ۾ آئي فون استعمال ڪندڙن لاءِ دستياب آهي.

ايپ جي وضاحت مطابق هتي صارف بامعنيٰ ڳالهيون ڪري سگهن ٿا، حقيقي جواب ڏسي سگهن ٿا ۽ پنهنجي پسند جي ڪميونٽيز جو حصو بڻجي سگهن ٿا.

هي ايپ بنيادي طور تي سوشل ميڊيا سائيٽن Reddit ۽ Quora جهڙي آهي، جتي صارف سوال پڇي سگهن ٿا ۽ ڪميونٽي مان جواب حاصل ڪري سگهن ٿا.

ڊفالٽ طور هن ايپ ۾ Facebook گروپن جو مواد ڏيکاريو ويندو، جيڪو صارف جي دلچسپين تي ٻڌل هوندو.

Facebook موجب، هي ايپ خاص طور تي انهن ماڻهن لاءِ ٺاهي وئي آهي جيڪي فيس بڪ گروپس هلائين ٿا، ۽ انهن لاءِ هڪ نئون اي آءِ اسسٽنٽ پڻ فراهم ڪيو ويندو جيڪو گروپس جي انتظام ۽ مواد جي نگراني ۾ مدد ڪندو.

Facebook زور ڏنو آهي ته هن ايپ جو مقصد حقيقي ماڻهن کان جواب حاصل ڪرڻ آهي.

“فورم” استعمال ڪرڻ لاءِ صارف کي فيس بڪ اڪائونٽ جي ضرورت پوندي.

ممڪن طور تي هن ايپ جو مقصد اربين صارفين کي گڏ ڪري وڌيڪ حقيقي ۽ ڀروسي جوڳا جواب فراهم ڪرڻ آهي.

Meta Platforms جي هڪ ترجمان مطابق، هي ايپ هن وقت ٽيسٽنگ مرحلي مان گذري رهي آهي.

ترجمان چيو ته ڪمپني مسلسل نيون پراڊڪٽس آزمائي ٿي ته جيئن ماڻهن جي دلچسپين کي بهتر سمجهي سگهجي.