جڏهن ته دنيا جي اڪثر ملڪن ۾ اليڪٽرڪ گاڏين تي ڌيان ڏنو پيو وڃي، تڏهن آمريڪا جي هڪ يونيورسٽي جي شاگردن اهڙي منفرد گاڏي تيار ڪئي آهي جيڪا روايتي ايندھن جي تمام ٿوري مقدار سان سوين ميلن جو سفر ڪري سگهي ٿي.

آمريڪي رياست يوٽاه جي هڪ يونيورسٽي جي شاگردن هڪ تجرباتي گاڏي تيار ڪئي آهي، جيڪا هڪ ليٽر ايتھانول تي سوين ميلن جو فاصلو طئي ڪري سگهي ٿي. اهو ڪارنامو ان جي انتهائي هلڪي وزن ۽ ايروڊائنامڪ ڊيزائن سبب ممڪن ٿيو آهي.

هن گاڏي جو نالو "سپر مائليج" رکيو ويو آهي ۽ ان جو وزن رڳو 49 ڪلوگرام آهي. گاڏي جي باڊي هلڪي وزن واري ڪاربن فائبر مان تيار ڪئي وئي آهي.

ان جو فيول ٽينڪ به تمام ننڍڙو آهي، جنهن ۾ رڳو 30 ملي ليٽر ايندھن ڀري سگهجي ٿو.

هن ننڍڙي ٽينڪ ۾ موجود ايندھن سان گاڏي لڳ ڀڳ 20 ميلن جو سفر ڪري سگهي ٿي، جنهن کان پوءِ ٻيهر ايندھن ڀرڻ جي ضرورت پوي ٿي.

سپر مائليج کي "شيل ايڪو ميراٿون" مقابلي لاءِ تيار ڪيو ويو، جنهن ۾ اهڙيون گاڏيون شامل ٿينديون آهن جيڪي گهٽ ۾ گهٽ ايندھن سان وڌ ۾ وڌ فاصلو طئي ڪن.

هي گاڏي شاگردن پاران تيار ڪئي وئي آهي ۽ هڪ گيلن ايندھن تي لڳ ڀڳ 2145 ميلن تائين سفر ڪرڻ جي صلاحيت رکي ٿي. ان ۾ روايتي گاڏين جا ڪيترائي جديد فيچر شامل ناهن ڪيا ويا ته جيئن ايندھن جي بچت کي وڌ کان وڌ بڻائي سگهجي.

گاڏي ۾ رڳو هڪ ڊرائيور جي ويهڻ جي جاءِ موجود آهي، جڏهن ته ڊرائيور جو قد 5 فوٽ 4 انچ ۽ وزن 54 ڪلوگرام کان وڌيڪ نه هجڻ گهرجي.

سپر مائليج جي وڌ ۾ وڌ رفتار رڳو 23 ميل في ڪلاڪ آهي، تنهنڪري ان ۾ ڊگهو سفر ڪرڻ ڪجهه تڪليف ڏيندڙ ثابت ٿي سگهي ٿو.