لاهور: ايندڙ مالي سال جي وفاقي بجيٽ ۾ پنجاب جي سرڪاري ملازمن جي پگهارن ۾ واڌ وفاقي حڪومت جي فيصلي موجب ڪئي ويندي.
ذريعن موجب بجيٽ ۾ پگهارن لاءِ 650 ارب ۽ پينشن لاءِ 505 ارب 80 ڪروڙ رپيا مختص ڪرڻ جي تجويز آهي، جڏهن ته صوبائي ٽيڪسن مان 1330 ارب رپين جي آمدني متوقع آهي. ذريعن ٻڌايو ته پنجاب فنانس ڪميشن لاءِ 800 ارب رپيا رکڻ جي تجويز ڏني وئي آهي. ان کان علاوه سماجي تحفظ لاءِ 25 ارب ۽ ستھرا پنجاب پروگرام لاءِ 150 ارب رپيا مختص ڪرڻ جي تجويز پيش ڪئي وئي آهي.
ذريعن موجب آپريشنل خرچن لاءِ 580 ارب 20 ڪروڙ رپيا رکڻ جي سفارش ڪئي وئي آهي، جڏهن ته سيڙپڪاري جي ٻين منصوبن لاءِ 221 ارب 90 ڪروڙ رپيا مختص ڪرڻ جي تجويز آهي. ذريعن وڌيڪ ٻڌايو ته ٻاهرين معاونت سان جاري منصوبن لاءِ 54 ارب رپيا رکڻ جي سفارش ڪئي وئي آهي، جڏهن ته ترقياتي ۽ سرمائياتي ٻين خرچن لاءِ 570 ارب رپيا رکڻ جي تجويز آهي. مجموعي طور پنجاب جا خرچ 3569 ارب 60 ڪروڙ رپيا ٿيڻ جي تجويز آهي.
