آمريڪا طرفان پابندين ۾ ڏنل ڇوٽ ختم ٿيڻ کانپوءِ ايران جو لڳ ڀڳ 6 ڪروڙ 30 لک بيرل خام تيل سمنڊ ۾ ڦاسي ويو آهي.
آمريڪي جريدي بلومبرگ موجب جهازن جي ٽريڪنگ ڊيٽا مان ظاهر ٿئي ٿو ته ايران جي لکين بيرل خام تيل سان ڀريل ٽينڪر خليج فارس کان وٺي آبنائے ملاڪا تائين يا ته سفر ۾ آهن يا بيٺل آهن.
رپورٽ موجب جيڪڏهن وڌندڙ ڇڪتاڻ سبب آمريڪي ناڪابندي ٻيهر سخت ڪئي وئي ته ايران جا لڳ ڀڳ 5 ڪروڙ بيرل خام تيل ۽ ريفائنڊ پيٽروليم شيون به ڦاسي سگهن ٿيون.
واضح رهي ته گذريل ڏينهن آمريڪا آبنائے هرمز ۾ ڪمرشل جهازن کي نشانو بڻائڻ جو الزام ايران تي لڳائيندي، ايران جي تيل جي وڪرو تي ٻيهر پابندي لاڳو ڪئي هئي.
آمريڪا ۽ ايران وچ ۾ ٿيل مفاهمتي يادداشت تحت ايران کي 21 آگسٽ تائين تيل وڪڻڻ جي اجازت ڏني وئي هئي، پر هاڻي آمريڪي خزاني واري کاتي نئين پابندي لاڳو ڪندي اها مدي 17 جولاءِ تائين محدود ڪري ڇڏي آهي.
