اسلام آباد: عالمي مالياتي اداري آءِ ايم ايف جي شرطن تي عمل ڪندي فيڊرل بورڊ آف روينيو (ايف بي آر) سرڪاري آفيسرن جي اثاثن تائين بينڪن جي رسائي بابت انگ اکر عوام آڏو آڻڻ جو فيصلو ڪري ڇڏيو آهي. ان قدم جو مقصد شفافيت کي هٿي ڏيڻ ۽ اينٽي مني لانڊرنگ سميت دهشتگردي جي مالي معاونت جي روڪٿام لاءِ نگراني کي وڌيڪ مؤثر بڻائڻ آهي.
ايف بي آر پاران جاري ڪيل مراسلي موجب گريڊ 17 کان 22 تائين جي سرڪاري آفيسرن جي اثاثن جي گوشوارن تائين بينڪن کي هڪ مخصوص ڊجيٽل پورٽل ذريعي رسائي فراهم ڪئي پئي وڃي. هي سهولت خاص طور تي مالي جاچ ۽ قانوني گهرجن کي پورو ڪرڻ لاءِ متعارف ڪرائي وئي آهي.
مراسلي ۾ چيو ويو آهي ته آءِ ايم ايف جي بينچ مارڪ جي شق 38(ايف) تحت ايف بي آر لاءِ لازم قرار ڏنو ويو آهي ته جون 2026 تائين پنهنجي ويب سائيٽ تي انهن درخواستن جا تفصيلي انگ اکر شايع ڪري. ان جو مقصد نه رڳو شفافيت وڌائڻ آهي پر بينڪن ۽ لاڳاپيل ادارن ۾ هن سهولت بابت آگاهي پيدا ڪرڻ پڻ آهي.
ايف بي آر موجب ڊسمبر 2025 کان مئي 2026 تائين بينڪن پاران جمع ڪرايل درخواستن جا تفصيل جاري ڪيا ويندا، جن ۾ منظور ٿيل ۽ رد ٿيل درخواستن جو مڪمل رڪارڊ شامل هوندو.
دستياب انگن اکرن مطابق ڇهن مهينن دوران مجموعي طور 2,628 درخواستون موصول ٿيون، جن مان 2,205 درخواستون منظور ڪيون ويون، جڏهن ته 423 درخواستون مختلف سببن جي بنياد تي رد ڪيون ويون.
