بلوچستان ۾ پيٽرول ۽ ڊيزل جي شديد کوٽ سبب صورتحال وڌيڪ خراب ٿي وئي آهي، جتي ڪجهه علائقن ۾ في ليٽر پيٽرول ۽ ڊيزل 500 رپين تائين وڪرو ٿيڻ لڳو آهي.
ڪوئٽا سميت مختلف علائقن ۾ ڪيترائي پيٽرول پمپ بند پيل آهن، جڏهن ته جيڪي کليل آهن اتي شهرين جون ڊگهيون قطارون لڳل آهن، جنهن سبب ماڻهو ذهني دٻاءُ جو شڪار ٿي رهيا آهن.
اندروني علائقن جهڙوڪ نوشڪي، خاران ۽ لورالائي ۾ پيٽرول جي کوٽ وڌيڪ شدت اختيار ڪري وئي آهي ۽ قيمتون غير معمولي حد تائين وڌي ويون آهن.
پيٽروليم ڊيلرز ايسوسيئيشن جي صدر قيام الدين آغا موجب شڪارپور کان پيٽرول جي فراهمي ۾ اضافو ڪيو ويو آهي ۽ اميد آهي ته ايندڙ هڪ ٻن ڏينهن ۾ صورتحال بهتر ٿي ويندي.
ڊي سي ڪوئٽا موجب ايران کان پيٽرول جي سپلاءِ بند ٿيڻ سبب پمپن تي رش وڌي وئي آهي، جڏهن ته اڄ ڪوئٽا جي پمپن تي 6 لک ليٽر پيٽرول فراهم ڪيو ويو آهي.
