: پاڪستان ۽ ايران جي وچ ۾ ٻطرفي واپار کي هٿي ڏيڻ لاءِ اهم اڳڀرائي سامهون آئي آهي. ايف بي آر تفتان بارڊر ريلوي اسٽيشن کي درآمد ۽ برآمد لاءِ لينڊ ڪسٽمز اسٽيشن قرار ڏئي ڇڏيو آهي.
هن فيصلي سان ريل ذريعي ٻنهي ملڪن وچ ۾ واپاري سامان جي آمدرفت وڌيڪ آسان بڻجي ويندي، جنهن سان ٽرانسپورٽ جا خرچ گهٽجڻ ۽ قانوني واپار ۾ واڌ ٿيڻ جا امڪان آهن.
ايراني نيوز ايجنسي ارنا موجب تفتان اسٽيشن تي لوڊنگ، اَن لوڊنگ، ڪسٽمز ڪليئرنس سميت درآمد ۽ برآمد جون سموريون سهولتون فراهم ڪيون وينديون.
ٻنهي ملڪن واپار جو حجم 5 ارب ڊالر تائين وڌائڻ جي عزم جو اظهار ڪيو آهي. ماهرن جو چوڻ آهي ته هن قدم سان اسمگلنگ جي حوصلا شڪني ٿيندي ۽ قانوني واپار کي وڌيڪ هٿي ملندي.
