اسلام آباد ۾ فنانس بل 27-2026 جا نوان تفصيل سامهون اچي ويا آهن، جن مطابق پهرين جولاءِ کان گاڏين تي ٽيڪس ۽ ڊيوٽيز ۾ وڏي تبديلي ڪئي پئي وڃي.

فنانس بل موجب 2000 سي سي کان مٿي 3000 سي سي تائين امپورٽ ٿيل گاڏين تي 86 سيڪڙو ڊيوٽي لڳائي ويندي، جڏهن ته 3001 سي سي کان وڌيڪ گاڏين تي 92 سيڪڙو ڊيوٽي لاڳو ٿيندي.

1800 سي سي تائين گاڏين تي خاص ايڪسائز ڊيوٽي ختم ڪئي پئي وڃي، جڏهن ته 1800 سي سي کان مٿي گاڏين تي اڳوڻي شرحون گهٽ ڪيون ويون آهن.

ننڍين گاڏين تي به رليف ڏنو ويو آهي، جنهن تحت 850 سي سي گاڏين تي ڊيوٽي 66 سيڪڙو مان گهٽائي 42 سيڪڙو ڪئي وئي آهي، جڏهن ته 1000 کان 1500 سي سي گاڏين تي به شرح گهٽائي 52 سيڪڙو مقرر ڪئي وئي آهي.

نئين آٽو پاليسي تحت اليڪٽرڪ گاڏين تي به نوان ٽيڪس لاڳو ڪيا ويا آهن، جن مطابق وڏين اي وي گاڏين تي 30 کان 40 سيڪڙو ڪسٽم ڊيوٽي لڳائي ويندي.

وفاقي سطح تي ٽوڪن ٽيڪس ۾ به تبديليون ڪيون ويون آهن، جنهن موجب مختلف انجڻ ڪيپيسٽي ۽ ماڊل سال جي بنياد تي فڪس ٽيڪس ۽ فيصد جي حساب سان ٽيڪس وصول ڪيو ويندو.

اهي تبديليون پهرين جولاءِ کان لاڳو ٿينديون، جيڪي گاڏين جي مارڪيٽ ۽ خريداري تي اهم اثر وجهنديون.