: ڪراچي جي ڪلثوم بائي وليڪا اسپتال ۾ وڌيڪ 16 ٻارن ۾ ايڇ آءِ وي جي تشخيص ٿيڻ جو انڪشاف ٿيو آهي
ڪراچي جي ڪلثوم بائي وليڪا اسپتال ۾ نوجوان ٻارن ۾ ايڇ آءِ وي پکڙجڻ واري معاملي تي سنڌ جي محتسب سخت ڪاوڙ جو اظهار ڪندي اسپتال جي ڪارڪردگي جو جائزو ورتو.
سنڌ جي محتسب محمد سهيل راجپوت جي صدارت هيٺ وليڪا اسپتال ۾ ايڇ آءِ وي جي پکڙجڻ بابت ڪيس جي ٻڌڻي ٿي، جنهن ۾ سيڪريٽري ليبر سنڌ ساجد جمال ابڙو، ڪمشنر سيسي هادي بخش ڪلهوڙو، سينيئر ميڊيڪل ايڊوائزر، فوڪل پرسن، ميڊيڪل سپرنٽنڊنٽ ۽ متاثر ٻارن جي والدين شرڪت ڪئي.
ٻڌڻي دوران بريفنگ ۾ ٻڌايو ويو ته وڌيڪ 16 ٻارن ۾ ايڇ آءِ وي جي تشخيص ٿي آهي، جڏهن ته وڌيڪ ڪيس سامهون اچڻ جو به خدشو ظاهر ڪيو ويو آهي.
متاثر ٻارن جي والدين اسپتال انتظاميا جي عدم سهڪار، دوائن جي کوٽ، علاج جي خرچن جي ادائيگي ۾ دير ۽ انتظامي روين بابت شڪايتون پيش ڪيون.
صوبائي محتسب اسپتال جي عملي جي ڪارڪردگي تي افسوس جو اظهار ڪندي هدايت ڪئي ته ضرورت موجب تربيت يافته عملي کي مقرر ڪيو وڃي ۽ سنڌ انفيڪشس ڊزيز اسپتال مان ڇهن مهينن لاءِ ماهر ڊاڪٽرن جي ڊيپيوٽيشن جي ڪوشش ڪئي وڃي.
هن دوائن، غذائي سپليمينٽن ۽ ٻين ضروري سامان جي وقت سر فراهمي کي يقيني بڻائڻ جي پڻ هدايت ڪئي.
محمد سهيل راجپوت چيو ته بظاهر اسپتال جا مالي معاملا ٻارن ۾ ايڇ آءِ وي جي پکڙجڻ جي هڪ اهم سبب بڻيا آهن.
هن اسپتال جي مالي آڊٽ لاءِ ٻن هفتن اندر ڪنهن مشهور آڊٽ ڪمپني جي چونڊ، متاثر مزدور والدين جي بحالي، فوت ٿي ويل ٻارن جي معاوضي، متاثر ٻارن جي بحالي، نفسياتي سهائتا، آگاهي مهم شروع ڪرڻ ۽ اسپتال ۾ فوري طور هيلپ ڊيسڪ قائم ڪرڻ جون هدايتون جاري ڪيون.
سنڌ جي صوبائي محتسب ڪيس جي وڌيڪ ٻڌڻي ٻن هفتن لاءِ ملتوي ڪري ڇڏي.
