ماهرن موجب انساني جسم عام طور تي پنهنجي اندروني گرمي پد کي تقريباً 36.5°C کان 37.5°C تائين برقرار رکي ٿو، پر جڏهن ٻاهر جو گرمي پد وڌي وڃي ته جسم کي پاڻ کي ٿڌو رکڻ لاءِ وڌيڪ محنت ڪرڻي پوي ٿي. تحقيقن مان معلوم ٿيو آهي ته وڌيڪ نمي (humidity) واري ماحول ۾ 35°C تائين گرمي انساني جسم لاءِ آخري برداشت جي حد سمجهي وڃي ٿي، ڇو ته ان کان وڌيڪ گرمي ۾ جسم پسيني کي بخارات بڻائي پاڻ کي ٿڌو نٿو رکي سگهي، جنهن سان هيٽ اسٽروڪ جو خطرو وڌي وڃي ٿو.

تازين سائنسي تحقيقن موجب جڏهن گرمي پد 40°C يا ان کان وڌيڪ ٿي وڃي، خاص طور تي نمي سان گڏ، ته جسم کي پاڻ کي ٿڌو رکڻ ۾ سخت ڏکيائي پيش اچي ٿي ۽ دل سميت جسماني نظام تي دٻاءُ وڌي وڃي ٿو. وڌيڪ نمي واري حالتن ۾ ته 30°C کان مٿي گرمي به خطرناڪ ٿي سگهي ٿي. ماهرن جو چوڻ آهي ته خشڪ موسم ۾ جسم ڪجهه حد تائين پسيني ذريعي گرمي کي ڪنٽرول ڪري سگهي ٿو، پر مرطوب موسم ۾ اهو عمل گهٽ اثرائتو ٿي وڃي ٿو، جنهن سبب گرمي وڌيڪ خطرناڪ بڻجي وڃي ٿي.