ملڪ ڀر ۾ جعلي دوائن جو خاتمو يقيني بڻائڻ لاءِ وفاقي ڪابينا دوائن تي ٽريڪ اينڊ ٽريس سسٽم لاڳو ڪرڻ جي باضابطه منظوري ڏئي ڇڏي آهي. وفاقي وزير صحت مصطفىٰ ڪمال چيو آهي ته ڊرگ ليبلنگ اينڊ پيڪنگ رولز 1978 ۾ ضروري ترميمون منظور ڪيون ويون آهن، ۽ اهو فيصلو پاڪستان ۾ جعلي دوائن جي خاتمي ڏانهن هڪ وڏو ۽ تاريخي قدم آهي.
هن چيو ته پهريون ڀيرو هر دوا کي ڊجيٽل طريقي سان ٽريڪ ۽ تصديق ڪري سگهجي ٿو، جنهن سان جعلي، غير معياري ۽ نقلي دوائن جي سڃاڻپ ۽ خاتمو ممڪن ٿي ويندو. نئين نظام تحت عام صارف به آساني سان دوا جي ميعاد، قيمت ۽ اصليت بابت مستند معلومات حاصل ڪري سگهندو.
وفاقي وزير موجب ڊرگ ريگيوليٽري اٿارٽي آف پاڪستان (DRAP) هن جديد نظام کي ملڪ ڀر ۾ لاڳو ڪندي. نون قاعدن تحت سڀني دوا ساز ڪمپنين ۽ درآمد ڪندڙن لاءِ لازمي هوندو ته هو هر دوا جي پيڪ تي معياري 2D بارڪوڊ ۽ سيريلائيزيشن ڊيٽا درج ڪن.
مصطفىٰ ڪمال چيو ته پاڪستان ۾ دوائن جي نظام کي جديد بنيادن تي استوار ڪيو پيو وڃي، ۽ ٽريڪ اينڊ ٽريس سسٽم سان جعلي دوائن خلاف هڪ مضبوط ۽ مؤثر نظام قائم ٿيندو. هن وڌيڪ چيو ته پاڪستان خطي ۾ جديد ٽيڪنالاجي اپنائڻ وارن ملڪن ۾ اڳتي وڌندو، ۽ هن نظام سان روايتي نگراني بدران مڪمل طور تي ڊجيٽل ڪنٽرول ممڪن ٿيندو.
