پاڻي انساني صحت لاءِ انتهائي اهم آهي، خاص طور تي گرم موسم ۾ جسم ۾ پاڻي جي کوٽ صحت لاءِ نقصانڪار ثابت ٿي سگهي ٿي.
اڃ جسم جو اهو اشارو آهي جيڪو ٻڌائي ٿو ته جسم کي صحيح نموني ڪم ڪرڻ لاءِ پاڻي جي ضرورت آهي. ڊي هائيڊريشن جو مطلب آهي ته جسم ۾ پاڻي جي کوٽ ٿي وئي آهي ۽ روزمره جي ڪمن لاءِ گهربل مقدار ۾ پاڻي موجود ناهي.
ڊي هائيڊريشن جون عام نشانيون اڃ لڳڻ، پيشاب جو ڳاڙهو رنگ، معمول کان گهٽ پيشاب اچڻ، وات ۽ چمڙي جو سڪي وڃڻ، ٿڪاوٽ، چڪر اچڻ ۽ مٿي جو سور شامل آهن.
جيڪڏهن اڃ محسوس نه ٿئي ته به توهان هڪ آسان ٽيسٽ سان جسم ۾ پاڻي جي کوٽ جو اندازو لڳائي سگهو ٿا. ان لاءِ هٿ جي پٺي واري چمڙي کي ڪجهه سيڪنڊن لاءِ چنبڙي پوءِ ڇڏي ڏيو. جيڪڏهن چمڙي فوراً پنهنجي اصل حالت ۾ واپس اچي وڃي ته جسم ۾ پاڻي مناسب مقدار ۾ موجود آهي، پر جيڪڏهن واپس اچڻ ۾ وڌيڪ وقت لڳي ته اهو ڊي هائيڊريشن جي نشاني ٿي سگهي ٿو.
2007ع ۾ ايمرجنسي ميڊيڪل جرنل ۾ شايع ٿيل هڪ تحقيق موجب چمڙي جي بناوت ۽ لچڪ تي پاڻي جي کوٽ جو اثر پوي ٿو، تنهن ڪري هي سادو ٽيسٽ ڊي هائيڊريشن جي سڃاڻپ ۾ مددگار ثابت ٿي سگهي ٿو.
ماهرن موجب عمر وڌڻ سان چمڙي جي لچڪ قدرتي طور گهٽجي ويندي آهي، تنهن ڪري وڏي عمر وارن ماڻهن ۾ چمڙي کي واپس معمول تي اچڻ ۾ ڪجهه وڌيڪ وقت لڳي سگهي ٿو، پر جيڪڏهن گهڻو وقت لڳي ته کين پاڻي ضرور پيئڻ گهرجي.
