ڪراچي ۾ گيسٽرو ۽ دستن جي مريضن جي تعداد ۾ تيزي سان واڌ ٿي رهي آهي، جنهن سبب شهر جي وڏن اسپتالن جي ايمرجنسي شعبن ۾ مريضن جو رش وڌي ويو آهي. ڊاڪٽر عمران سرور موجب سول اسپتال ۾ روزانو پيٽ جي بيمارين ۽ دستن جا 200 کان وڌيڪ مريض علاج لاءِ اچي رهيا آهن، جڏهن ته جناح اسپتال ۾ به روزانو اهڙن مريضن جو انگ 150 کان وڌي ويو آهي. طبي ماهرن جو چوڻ آهي ته شهري پيٽ جي سور، الٽي، متلي ۽ دستن جي شڪايتن سان اسپتالن جو رخ ڪري رهيا آهن. ماهرن خبردار ڪيو آهي ته غير معياري ۽ آلودہ کاڌو گيسٽرو جي پکڙجڻ جو وڏو سبب بڻجي رهيو آهي. شهرين کي صلاح ڏني وئي آهي ته هو صاف سٿرو ۽ تازو کاڌو استعمال ڪن، کاڌي کي ڍڪي رکن ۽ فريج ۾ مناسب گرمي پد تي محفوظ ڪن.
