ڀارتي پنجابي فلم انڊسٽري جي مشهور اداڪارا ۽ ماڊل ايشا رِکهي آخرڪار ڳائڻي ۽ ريپر بادشاهه سان پنهنجي شادي جي تصديق ڪري ڇڏي آهي. انسٽاگرام تي مداحن سان سوال جواب واري سيشن دوران هن پنهنجي ازدواجي زندگي بابت کلي ڳالهه ٻولهه ڪئي.
مداحن پاران سڀ کان وڌيڪ پڇيل سوال اهو هو ته جيڪڏهن هوءَ ۽ بادشاهه شادي شده آهن ته پوءِ ٻئي سوشل ميڊيا تي هڪ ٻئي کي فالو ڇو نٿا ڪن. ان تي ايشا مزاحيه انداز ۾ جواب ڏيندي چيو ته ها، منهنجي شادي ٿي چڪي آهي، جڏهن ته ان سوال جو اصل جواب منهنجي مڙس بادشاهه کي ڏيڻ گهرجي.
هڪ ٻئي مداح پڇيو ته شادي باوجود هن ڪڏهن به بادشاهه سان گڏ تصوير ڇو شيئر نه ڪئي. ان سوال جي جواب ۾ ايشا پهريون ڀيرو پنهنجي مڙس سان گڏ هڪ ناياب ۽ محبت ڀري تصوير شيئر ڪئي، جيڪا سوشل ميڊيا تي تيزي سان وائرل ٿي وئي. مداحن جوڙي لاءِ نيڪ تمنائن ۽ مبارڪن جو اظهار ڪيو.
واضح رهي ته مارچ مهيني ۾ ايشا رِکهي جي والده طرفان شيئر ڪيل ڪجهه تصويرن ۽ وڊيوز کان پوءِ ٻنهي جي شادي بابت افواهون سامهون آيون هيون، پر ان وقت جوڙي طرفان ڪنهن به قسم جي باضابطه تصديق نه ڪئي وئي هئي.
