بالي ووڊ اداڪار عامر خان ۽ گوري اسپرٽ جي شادي جي تقريب بابت نوان تفصيل سامهون اچي ويا آهن. ڀارتي ميڊيا موجب، ٻنهي جي شادي آچر تي ممبئي ۾ عامر خان جي رهائشگاهه تي سادي ۽ خانگي تقريب دوران ٿيندي.

عامر خان اڳ ئي هڪ انٽرويو ۾ 5 جولاءِ کي پنهنجي زندگي جو خاص ڏينهن قرار ڏيندي ٻڌايو هو ته شادي جي ننڍڙي تقريب گهر ۾ منعقد ڪئي ويندي، جنهن ۾ صرف ٻنهي خاندانن جا فرد ۽ ويجها دوست شرڪت ڪندا.

ميڊيا رپورٽن موجب، عامر خان ذاتي طور مهمانن جي فهرست ۽ کاڌي جي مينيو کي حتمي شڪل ڏني آهي. تقريب ۾ لڳ ڀڳ 100 کان 150 مهمانن جي شرڪت جو امڪان آهي، جڏهن ته کاڌي ۾ عامر خان ۽ گوري اسپرٽ جي پسنديده طعام شامل ڪيا ويا آهن.

رپورٽن موجب، عامر خان پنهنجي پراڻن دوستن ۽ فلم سازن آشوتوش گوارڪر ۽ راج ڪمار سنتوشي کي به شادي جي دعوت ڏني آهي.

واضح رهي ته عامر خان پنهنجي 60هين سالگرهه جي موقعي تي پهريون ڀيرو گوري اسپرٽ کي عوام آڏو متعارف ڪرايو هو ۽ سندن لاڳاپي جي باضابطه تصديق پڻ ڪئي هئي. عامر خان جي پهرين شادي رينا دتا سان 1986ع ۾ ٿي، جيڪا بعد ۾ ختم ٿي وئي، جڏهن ته ٻي شادي ڪرن رائو سان 2005ع ۾ ٿي ۽ ٻنهي 2021ع ۾ الڳ ٿيڻ جو اعلان ڪيو هو.