بالي ووڊ جي مشهور پروڊيوسر بوني ڪپور جي ڌيءَ ۽ اداڪار ارجن ڪپور جي ڀيڻ انشولا ڪپور شادي جي ٻنڌڻ ۾ ٻڌجي وئي آهي.

ڀارتي ميڊيا موجب انشولا ڪپور پنهنجي بواءِ فرينڊ روهن ٺاڪر سان شادي ڪئي آهي. انشولا پنهنجي شادي جون خوبصورت تصويرون سوشل ميڊيا پليٽفارم انسٽاگرام تي شيئر ڪيون، جن ۾ ٻنهي کي شادي جون رسمون ادا ڪندي ڏسي سگهجي ٿو.

شيئر ڪيل تصويرن مان هڪ ۾ انشولا جون سوتيليون ڀينرون، بوني ڪپور ۽ سري ديوي جون ڌيئرون جھانوي ڪپور ۽ خوشي ڪپور پڻ تقريب ۾ موجود نظر اچن ٿيون.

انشولا ڪپور تصويرن سان گڏ هڪ جذباتي ڪيپشن به لکيو، جنهن ۾ هن 6 جولاءِ تي ٿيل پنهنجي شادي جو ذڪر ڪندي پنهنجي مڙس لاءِ محبت جو اظهار ڪيو.

ڀارتي ميڊيا موجب شادي جي تقريب نهايت خانگي نوعيت جي هئي، جنهن ۾ رڳو خاندان جي ويجهن ميمبرن ۽ دوستن شرڪت ڪئي.

واضح رهي ته انشولا ڪپور ۽ روهن ٺاڪر جي مڱڻي جولاءِ 2025ع ۾ ٿي هئي.