بالي ووڊ اداڪارا پريتي زنٽا پنهنجي نالي سان تيار ڪيل جعلي اي آءِ (مصنوعي ذهانت) ڊيپ فيڪ وڊيوز، تبديل ٿيل تصويرن ۽ ٻين غيرمجاز ڊجيٽل مواد خلاف بمبئي هاءِ ڪورٽ سان رجوع ڪيو آهي.

درخواست ۾ پريتي زنٽا موقف اختيار ڪيو آهي ته مصنوعي ذهانت جي مدد سان سندس چهري ۽ سڃاڻپ کي استعمال ڪندي بغير اجازت ڊيپ فيڪ وڊيوز، تبديل ٿيل تصويرون ۽ چيٽ بوٽ طرز جو مواد تيار ڪري سوشل ميڊيا ۽ ٻين آن لائن پليٽ فارمن تي نشر ڪيو پيو وڃي، جنهن سان سندس ساک ۽ شهرت متاثر ٿي سگهي ٿي.

اداڪارا عدالت کان درخواست ڪئي آهي ته سندس نالي ۽ سڃاڻپ استعمال ڪري تيار ڪيل سمورو تڪراري مواد فوري طور هٽايو وڃي ۽ مستقبل ۾ اهڙو مواد شايع ڪرڻ تي به پابندي لڳائي وڃي.

هي درخواست جسٽس مادھو جمدار جي سربراهي ۾ ٻڌڻي لاءِ پيش ٿي، جتي عدالت شروعاتي دليل ٻڌڻ کانپوءِ لاڳاپيل ڌرين ۽ آن لائن پليٽ فارمن کي هدايت ڪئي ته تڪراري مواد هٽائڻ لاءِ گڏيل طريقيڪار تيار ڪيو وڃي. ڪيس جي وڌيڪ ٻڌڻي 6 جولاءِ تي ٿيندي.

واضح رهي ته ڊيپ فيڪ ٽيڪنالاجي مصنوعي ذهانت جي ذريعي اهڙيون وڊيوز، تصويرون يا آڊيو تيار ڪري ٿي، جن ۾ ڪنهن شخص کي اهي ڳالهيون يا عمل ڪندي ڏيکاريو ويندو آهي، جيڪي حقيقت ۾ ڪڏهن به پيش نه آيا هوندا.