پاڪستان جي سينيئر اداڪار وسيم عباس پنهنجي ٻي شادي ۽ پوءِ ٿيل طلاق بابت ڪجهه اهم انڪشاف ڪيا آهن.

سوشل ميڊيا تي وائرل ٿيل هڪ انٽرويو ۾ وسيم عباس اداڪارا صبا حميد سان پنهنجي ازدواجي زندگي ۽ عليحدگي بابت ڳالهائيندي چيو ته سندن شادي 29 سال هلي، جنهن کانپوءِ ٻنهي باهمي رضامندي سان طلاق وٺڻ جو فيصلو ڪيو. هن چيو ته سندس دعائون اڄ به صبا حميد سان گڏ آهن ۽ هو چاهي ٿو ته هوءَ هميشه خوش رهي.

وسيم عباس چيو ته ضروري ناهي ته هر ختم ٿيندڙ رشتي ۾ هڪ ڌر صحيح ۽ ٻي غلط هجي، ڪيترين ئي حالتن ۾ ٻئي پنهنجي پنهنجي جاءِ تي صحيح هوندا آهن ۽ ٻنهي وٽ پنهنجا جائز سبب هوندا آهن.

هن وڌيڪ چيو ته سخت ۽ ناخوشگوار زندگي گذارڻ بدران مناسب وقت تي عزت ۽ احترام سان الڳ ٿي وڃڻ بهتر هوندو آهي. وسيم عباس موجب سندن گڏيل ڪو به ٻار نه هو، سندس پهرين شادي مان چار ۽ صبا حميد جي پهرين شادي مان ٻه ٻار هئا، جڏهن ته شادي وقت ٻنهي اهو فيصلو ڪيو هو ته گڏيل اولاد نه ڪندا.

هڪ سوال جي جواب ۾ وسيم عباس چيو ته صبا حميد سان سندس ڪا به ناراضگي ناهي، اڄ به جيڪڏهن ڪٿي ملاقات ٿئي ٿي ته خوشگوار ماحول ۾ ڳالهه ٻولهه ٿيندي آهي، ۽ جيڪڏهن ڪنهن ڊرامي ۾ گڏ ڪم ڪرڻ جو موقعو مليو ته هو خوشي سان گڏ ڪم ڪندا.