ايبٽ آباد جي خوبصورت سياحتي ماڳ نٿيا گلي جي سير دوران مشهور اداڪارا جگن ڪاظم جڳهه جڳهه تي پکڙيل ڪچري ۽ گندگي کي ڏسي سخت ڪاوڙ جو اظهار ڪيو آهي. سوشل ميڊيا تي وائرل ٿيندڙ هڪ وڊيو ۾ اداڪارا عوام جي غير ذميوار رويي تي تنقيد ڪندي نظر اچي رهي آهي.
جگن ڪاظم وڊيو ۾ چيو ته هوءَ نٿيا گلي جهڙي حسين علائقي ۾ گهمڻ آئي آهي، پر تقريباً هر هنڌ ڪچري جا ڍير ڏسي مايوس ٿي وئي آهي. هن سوال اٿاريو ته جيڪي ماڻهو پلاسٽڪ جون ٿيلهيون ۽ ٻيو ڪچرو اڇلائن ٿا، ڇا اهي انهن کي ڪچري دان ۾ نٿا وجهي سگهن؟
اداڪارا وڌيڪ چيو ته اسان هميشه ملڪ جي حالتن بابت شڪايتون ڪندا رهون ٿا ۽ پڇندا رهون ٿا ته ملڪ ڪيئن بهتر ٿيندو، پر جيڪڏهن اسان پاڻ صفائي جو خيال نٿا رکون ته بهتري ڪيئن ايندي؟ هن چيو ته ماڻهو هڪ طرف ماحولياتي تبديلين بابت ڳڻتي ظاهر ڪن ٿا، جڏهن ته ٻئي طرف پنهنجي چوڌاري ماحول کي گندو ڪرڻ کان به نٿا ڪيٻائن.
جگن ڪاظم جو چوڻ هو ته الله تعاليٰ اسان کي انتهائي خوبصورت فطرت ۽ ماحول سان نوازيو آهي، پر اسان ان جو خيال نٿا رکون. هن چيو ته جڏهن موسمي حالتون خراب ٿين ٿيون يا ماحولياتي مسئلا پيدا ٿين ٿا ته ان ۾ اسان جي پنهنجي به وڏي غلطي شامل هوندي آهي. اداڪارا عوام تي زور ڀريو ته سياحتي ماڳن ۽ قدرتي حسن واري هنڌن کي صاف سٿرو رکڻ لاءِ ذميواري جو مظاهرو ڪيو وڃي.
