ڀارتي رياست اوڙيسا ۾ اٺين جماعت جي درسي ڪتاب ۾ بالي ووڊ جي مشهور گاني "نمبوڙا نمبوڙا" جا بول شامل ڪرڻ کانپوءِ نئون تڪرار پيدا ٿي ويو آهي.
ڀارتي ميڊيا جي رپورٽ موجب، هي گانو اٺين جماعت جي آرٽ ايجوڪيشن جي درسي ڪتاب "ڪيرتي" ۾ شامل ڪيو ويو آهي، جيڪو ڀارت جي قومي تعليمي پاليسي 2020 تحت تيار ڪيو ويو هو.
درسي ڪتاب ۾ مشهور بالي ووڊ فلم "هم دل دي چڪي صنم" جي گاني "نمبوڙا نمبوڙا" جا بول راجسٿاني لوڪ گيت طور شامل ڪيا ويا آهن، جڏهن ته هي گانو بلاڪ بسٽر فلم ۾ ايشوريا راءِ ۽ سلمان خان تي فلمايو ويو هو، جيڪا 1999ع ۾ رليز ٿي هئي.
ڀارتي ميڊيا موجب، جيئن ئي درسي ڪتاب جون تصويرون سوشل ميڊيا تي وائرل ٿيون ته ماڻهن اوڙيسا جي ثقافتي ۽ لوڪ ورثي کي هٿي ڏيڻ بدران بالي ووڊ فلمن جا گيت درسي ڪتاب ۾ شامل ڪرڻ تي سخت ناراضگي جو اظهار ڪيو.
رپورٽ موجب، اوڙيسا جي وڏي وزير موهن چرن ماجهي ۽ تعليم واري وزير نتيانند گونڊ هن معاملي تي فوري ڪارروائي جو حڪم ڏئي ڇڏيو، جڏهن ته رياست جي ڪائونسل آف ايجوڪيشنل ريسرچ اينڊ ٽريننگ (SCERT) جي سينيئر عملدارن کي پڻ معطل ڪيو ويو آهي.
رپورٽ ۾ اهو به ٻڌايو ويو آهي ته رياستي حڪومت SCERT جي 6 اهلڪارن خلاف باقاعده جاچ جو حڪم ڏنو آهي. هن معاملي جي جاچ لاءِ هڪ خاص انڪوائري ڪميٽي پڻ قائم ڪئي وئي آهي، جنهن مستقبل جي درسي ڪتابن جي جائزي جي عمل کي وڌيڪ مضبوط بڻائڻ ۽ اهڙين غلطين کي روڪڻ لاءِ ڪوالٽي اشيورنس سيل قائم ڪرڻ جي سفارش پڻ ڪئي آهي.
