اسلام آباد: استحڪام پاڪستان پارٽي جي صدر عبدالعليم خان چيو آهي ته ڪشميري عوام جون محروميون ختم ڪرڻ، معياري تعليم، بنيادي سهولتن جي فراهمي ۽ شفاف حڪمراني پارٽي جون اهم ترجيحون آهن. هن چيو ته آزاد ڪشمير جا فيصلا اُتي جي عوام جي خواهشن ۽ مفادن موجب ڪيا ويندا ۽ ڪشميرين سان ڪيل سڀ واعدا پورا ڪيا ويندا.
آزاد ڪشمير جي اڳوڻي وزيراعظم سردار تنوير الياس استحڪام پاڪستان پارٽي ۾ شموليت اختيار ڪري ورتي، جڏهن ته ڪرنل محبوب، علي خان سوني، ملڪ ذوالفقار، صاحبه صديق، رياض گجر، طاهر کوکهر، راجا طالب، مرتضيٰ علي احمد، جبار مغل، تقديس گيلاني ۽ ٻين اڳواڻن پڻ پارٽي ۾ شموليت جو اعلان ڪيو.
پريس ڪانفرنس دوران عبدالعليم خان چيو ته جيڪڏهن کين حڪومت ٺاهڻ جو موقعو مليو ته ميرٽ، شفافيت ۽ عوامي خدمت کي هر صورت ۾ يقيني بڻايو ويندو. هن چيو ته سياست جو مقصد صرف اقتدار حاصل ڪرڻ نه، پر عوام جي زندگي بهتر بڻائڻ آهي، ڇاڪاڻ ته رڳو ڳالهين سان نه پر عملي قدمن سان ئي تبديلي آڻي سگهجي ٿي.
عبدالعليم خان وڌيڪ چيو ته ملڪ ۾ جديد شاهراهن ۽ موٽرويز جي تعمير تي تيزي سان ڪم جاري آهي. سکر کان ڪراچي موٽروي کي بندرگاهه سان ڳنڍڻ وارو منصوبو هن سال شروع ٿيندو، جڏهن ته اسلام آباد – مري ايڪسپريس وي کي مظفرآباد تائين وڌايو پيو وڃي، جنهن سان آزاد ڪشمير جي عوام کي محفوظ، تيز ۽ معياري سفري سهولتون فراهم ٿينديون.
